ٹک ٹاک نے سال 2025 کے لیے پاکستان میں سب سے زیادہ تلاش کیے جانے والے موضوعات کے تفصیلی اعداد و شمار جاری کر دیے ہیں۔
رپورٹ کے مطابق پاکستانی صارفین نے ٹک ٹاک کو محض تفریح کے لیے نہیں بلکہ معلومات کے حصول، خریداری کے فیصلے کرنے، سیاحتی مقامات کا انتخاب کرنے، نئے ہنر سیکھنے اور تعلیمی رہنمائی کے لیے بھی استعمال کیا۔ جنوبی ایشیا میں ٹک ٹاک کے کانٹینٹ آپریشنز لیڈ عمیس نوید کے مطابق سرچ بار اب پاکستانیوں کی روزمرہ زندگی کا لازمی حصہ بن چکی ہے، لوگ حقیقی وقت میں معلومات اور سیاق و سباق تلاش کر رہے ہیں، خواہ ویک اینڈ ٹرپ کی منصوبہ بندی ہو یا کسی پروڈکٹ کا ریویو۔
یوم قائد پر آئی ایس پی آر کا نیا ملی نغمہ ’’پیغامِ قائد‘‘جاری کر دیا گیا
فٹنس ٹاک کی تلاش میں سال بہ سال 66 فیصد اضافہ ہوا، جو صارفین کی صحت کے حوالے سے بڑھتی ہوئی دلچسپی اور ویڈیو رہنمائی کو ترجیح دینے کا عکاس ہے۔ سیاحت اور کھانوں سے متعلق مواد کی تلاش میں بھی نمایاں اضافہ ہوا، سیاحتی مقامات میں اسلام آباد سرِفہرست رہا، اس کے بعد ہنزہ کا تاریخی التت فورٹ، دریائے چناب، لاہور اور کراچی شامل ہیں۔ کھانے کے شعبے میں روایتی بریانی اور آلو کے ساتھ ساتھ وائرل فوڈ ٹرینڈز ’لاوا برگر‘، ’ماچا ڈرنک‘ اور ’دبئی چاکلیٹ‘ سب سے زیادہ تلاش کیے گئے۔
کرکٹ ہمیشہ کی طرح سب سے مقبول موضوع رہا، شائقین نے بابر اعظم کی سینچری، پاکستان بمقابلہ جنوبی افریقہ اور بھارت کے خلاف میچز کے لمحات تلاش کیے۔ کھلاڑیوں میں بابر اعظم، ویرات کوہلی اور حارث رؤف سب سے زیادہ زیرِ تلاش رہے۔
شوبز میں پاکستانی ڈرامے اور ترک سیریز مقبول رہے، جبکہ ریئلٹی شو ’تماشا‘ اور ’ہم ایوارڈز‘ بھی زیرِ بحث رہے۔
رپورٹ میں عملی زندگی سے متعلق موضوعات بھی نمایاں رہے، خواتین نے ’مہندی کے ڈیزائن‘ تلاش کیے، ٹیکنالوجی میں دلچسپی رکھنے والوں نے مصنوعی ذہانت (AI) کے استعمال اور پرامپٹس کے بارے میں معلومات حاصل کیں۔ علاوہ ازیں ’سافٹ ویئر اپ ڈیٹ‘ اور ’پروڈکٹ ریویوز‘ دیکھنا بھی ٹاپ ٹرینڈز میں شامل رہا، جو صارفین کے سوچ سمجھ کر فیصلے کرنے کے رجحان کو ظاہر کرتا ہے۔
