پاکستان ٹوبیکو کمپنی کے حکام نے غیر قانونی تمباکو صنعت کے خلاف حکومتی اقدامات کو سراہتے ہوئے کہا ہے کہ اس سلسلے میں کارروائیاں مسلسل اور سخت انداز میں جاری رکھنا ضروری ہیں۔
میڈیا بریفنگ میں بتایا گیا کہ 2025 کے دوران قانون نافذ کرنے والے اداروں نے تقریباً 17 ارب سگریٹ اسٹکس اور خام مال کو ضبط اور تلف کیا ہے۔ تاہم حکام کا کہنا تھا کہ غیر قانونی سگریٹ کا کاروبار ریکارڈ سطح تک پہنچ چکا ہے اور اسے روکنے کے لیے پائیدار حکمت عملی درکار ہے۔
سپریم کورٹ نے ریپ کیس کو رضا مندی سے زنا کیس میں تبدیل کر دیا
انہوں نے بتایا کہ غیر قانونی سگریٹ بنانے والوں نے اپنے طریق کار میں تبدیلی کرتے ہوئے چھوٹی اور غیر اعلانیہ پروڈکشن سائٹس قائم کر لی ہیں، جو کھیتوں، چاول کی ملز اور زیر زمین فیکٹریوں تک پھیلی ہوئی ہیں۔ اس مسئلے سے نمٹنے کے لیے سپلائی چین کے ہر حصے کی نگرانی ضروری ہے۔
پاکستان ٹوبیکو کمپنی کے ریگولیٹری انگیجمنٹ مینیجر حمزہ خان نے بتایا کہ ایکسائز ریونیو میں ظاہری اضافہ تو دیکھنے میں آیا ہے، لیکن افراط زر کے حقیقی اثرات کو مدنظر رکھا جائے تو یہ وصولیاں ایک دہائی پہلے سے کم تر ہیں۔ اس کی وجہ صارفین کا مہنگے قانونی برانڈز سے سستے غیر قانونی برانڈز کی طرف منتقل ہونا ہے، جو 2022-23 میں ایکسائز ڈیوٹی میں غیر معمولی اضافے کا نتیجہ ہے۔
انہوں نے بتایا کہ سگریٹ سازی میں استعمال ہونے والے اہم خام مال ایسیٹیٹ ٹو پر فیڈرل ایکسائز ڈیوٹی عائد کرنے کے بعد یہ پاکستان میں اسمگلنگ کی سب سے منافع بخش مصنوعہ بن گیا ہے۔ گزشتہ ایک سال میں 500 ٹن سے زیادہ ایسیٹیٹ ٹو ضبط کیا گیا، جو ٹیکس میں غیر متناسب اضافے کے منفی اثرات کی عکاسی کرتا ہے۔
حکام کے مطابق، دیگر اہم خام مال جن پر ایڈوانس ایف ای ڈی لاگو نہیں، ان کی درآمدات پچھلے سالوں کے برابر ہی جاری ہیں، جو اس بات کی نشاندہی کرتی ہیں کہ غیر قانونی پیداوار میں کوئی خاص کمی نہیں آئی۔
کمپنی نے پالیسی سازوں سے اپیل کی ہے کہ غیر قانونی تجارت کے خلاف کارروائیاں جاری رکھی جائیں تاکہ سرکاری ریونیو کا تحفظ ممکن ہو، ساتھ ہی متوازن ٹیکشن پالیسی اپنائی جائے جو قانونی کاروبار کے لیے منصفانہ اور مسابقتی ماحول پیدا کرے۔
