اسلام آباد: حکومت نے اینٹی منی لانڈرنگ اور دہشت گردی کی مالی معاونت کے خلاف کارروائی کو مزید مضبوط بنانے کے لیے سونے سمیت قیمتی دھاتوں کے کاروبار کی نگرانی سخت کرنے کا فیصلہ کیا ہے۔ اسٹیٹ بینک نے تجارتی بنیادوں پر منی لانڈرنگ روکنے کے لیے ایک نیا نگرانی نظام بھی نافذ کر دیا ہے۔
انسداد دِہشتگردی عدالت نے وزیراعلیٰ کے پی کو اشتہاری قرار دینے کی کارروائی کا آغاز کردیا
دستاویزات کے مطابق منی لانڈرنگ اور دہشت گردی کی مالی معاونت کے خلاف نظام کو مضبوط بنانے کا فیصلہ کیا گیا ہے، جس کے تحت سونے سمیت قیمتی دھاتوں کے کاروبار، رئیل اسٹیٹ ایجنٹس، ڈیلرز اور اس شعبے سے وابستہ افراد کی نگرانی میں اضافہ کیا جائے گا۔ تمام غیر مالیاتی کاروباروں اور پیشہ ور افراد کی موثر نگرانی کی جائے گی۔ آئی ایم ایف کے مطابق پاکستان کو تجارتی بنیادوں پر منی لانڈرنگ کے خطرات کا بھی سامنا ہے۔
وزارت خزانہ کے مطابق اسٹیٹ بینک نے تجارتی منی لانڈرنگ روکنے کے لیے نیا نگرانی نظام نافذ کر دیا ہے۔ ایف بی آر، اسٹیٹ بینک اور فنانشل مانیٹرنگ یونٹ تجارتی منی لانڈرنگ کے معاشی اثرات کا جائزہ لے رہے ہیں۔ قومی خطرے کا اندازہ لگانے والی رپورٹ مارچ 2026 تک متعلقہ اداروں کو پیش کر دی جائے گی۔ ایس ای سی پی نے جولائی 2025 میں مرکزی فائدہ اٹھانے والوں کا رجسٹر قائم کیا تھا، جو جنوری 2026 تک مالیاتی اداروں اور قانون نافذ کرنے والے اداروں کے لیے آن لائن دستیاب ہوگا۔
خزانہ کے حکام کے مطابق پاکستان اکتوبر 2022 میں مالیاتی کارروائی ٹاسک فورس (FATF) کی گرے لسٹ سے باہر آیا تھا، اور اس کی شرائط و سفارشات پر عمل درآمد جاری ہے۔
