کراچی میں سندھ ہائیکورٹ کے آئینی بینچ نے سابق صدر ڈاکٹر عارف علوی اور اہلخانہ کے بینک اکاؤنٹس منجمد کیے جانے کے خلاف دائر درخواستوں پر تفتیشی افسر کو ریکارڈ سمیت آئندہ سماعت پر طلب کرلیا۔ جسٹس یوسف علی سعید اور جسٹس عبد المبین لاکھو پر مشتمل بینچ کے روبرو سماعت ہوئی۔
اوپن اے آئی نے اپنا نیا اے آئی ماڈل جی پی ٹی 5.2 متعارف کرا دیا
درخواست گزار کے وکیل بیرسٹر علی طاہر نے مؤقف اختیار کیا کہ گزشتہ سماعت پر سابق صدر کے صاحبزادے عواب علوی اور ان کی اہلیہ کے بیانات ریکارڈ ہو چکے ہیں، لہٰذا کم از کم ان دونوں کے اکاؤنٹس بحال کیے جائیں۔ عدالت نے سرکاری وکیل سے تفتیشی افسر کی عدم حاضری پر استفسار کیا تو جواب میں بتایا گیا کہ وہ اسلام آباد سے آتے ہیں اور طبیعت ناساز ہونے کے باعث پیش نہیں ہوسکے۔
عدالت نے پوچھا کہ درخواست گزاروں پر کیا الزامات ہیں جس پر وکیل نے بتایا کہ ان پر مذہبی طور پر توہین آمیز بیانات کا الزام ہے۔ جسٹس عبد المبین لاکھو نے ریمارکس دیے کہ اسی وجہ سے اکاؤنٹس منجمد کیے گئے ہیں۔ درخواست گزار کے وکیل نے کہا کہ یہ شیڈول آفنس نہیں ہے، منی لانڈرنگ کا الزام بھی ہوتا تب بھی اکاؤنٹس منجمد نہیں کیے جاسکتے، روزمرہ اخراجات کے لیے دس لاکھ روپے نکلوانے کی اجازت دی جائے۔
عدالت نے استفسار کیا کہ کیا اس سے قبل ایسا حکم جاری ہوا ہے؟ نجی بینک کے وکیل نے بتایا کہ جون میں اسی درخواست میں دوسرے بینچ نے ایک بار 10 لاکھ روپے نکلوانے کی اجازت دی تھی۔ عدالت نے دریافت کیا کہ کس اکاؤنٹ سے رقم نکالنے کی اجازت درکار ہے؟ وکیل نے کہا کہ ڈاکٹر عارف علوی کے اکاؤنٹ سے اجازت دی جائے۔ اس پر عدالت نے نشاندہی کی کہ وہ ملک میں موجود نہیں جبکہ ان کے بیٹے اور دیگر اہلخانہ کے اکاؤنٹس بھی موجود ہیں۔
سرکاری وکیل نے کہا کہ تفتیشی افسر نے بیانات ریکارڈ کیے ہیں، لہٰذا اسے پیش ہونے کی مہلت دی جائے۔ عدالت نے تفتیشی افسر کو ریکارڈ سمیت آئندہ سماعت پر طلب کرتے ہوئے کارروائی 19 دسمبر تک ملتوی کردی۔
