حکومت کاعمران خان کو اڈیالہ جیل سے منتقل کرنے پر غور

اسلام آباد میں حکومت نے بانی پی ٹی آئی عمران خان کو اڈیالہ جیل سے منتقل کرنے پر غور شروع کر دیا ہے۔ ذرائع کے مطابق وفاقی حکومت کا کہنا ہے کہ معاملات اس مقام پر پہنچ چکے ہیں جہاں سے واپسی ممکن نہیں ہے۔ ان کا کہنا ہے کہ پی ٹی آئی ملک کو عدم استحکام کا شکار کرنے کے ایجنڈے پر عمل پیرا ہے اور احتجاج کے نام پر فتنہ فساد کی کوشش کی جا رہی ہے۔

نیشنل گیمز میں آرمی اور واپڈا کے کھلاڑیوں میں جھگڑا، اسٹیڈیم میدان جنگ بن گیا

اس حوالے سے وزیر اعظم کے کوآرڈینیٹر اختیار ولی نے کہا کہ وہ چاہتے ہیں کہ قیدی کو اڈیالہ سے منتقل کر دیا جائے اور حکومت بھی سنجیدگی سے اس پر غور کر رہی ہے۔ اختیار ولی نے الزام عائد کرتے ہوئے کہا کہ وزیر اعلیٰ خیبر پختونخوا سہیل آفریدی کا منشیات کے اسمگلروں سے گٹھ جوڑ ہے۔ ان کا کہنا تھا کہ وزیر اعلیٰ کی پرفارمنس زیرو نہیں بلکہ مائنس ہے۔

وزیر اعظم کے کوآرڈینیٹر کا کہنا تھا کہ وزیر اعلیٰ خیبر پختونخوا کے رشتے دار منشیات کے کاروبار میں ملوث ہیں اور وہ اس کی سرپرستی کرتے ہیں۔

واضح رہے کہ گزشتہ روز عمران خان سے ملاقات نہ ہونے پر ان کی بہنوں نے اڈیالہ جیل کے باہر دھرنا دیا تھا۔ پولیس نے مظاہرین کو منتشر کرنے کے لیے واٹر کینن کا استعمال کیا، جبکہ پی ٹی آئی کارکنان نے پولیس پر پتھراؤ کیا۔