پی ٹی آئی بہت سی چیزوں میں خود اپنی اصلاح کرنا چاہتی ہے: بیرسٹر گوہر

پاکستان تحریک انصاف (پی ٹی آئی) کے چیئرمین بیرسٹر گوہر نے کہا ہے کہ پی ٹی آئی بہت سی چیزوں میں خود اپنی اصلاح کرنا چاہتی ہے، اور ملاقاتوں میں رکاوٹیں ڈالنے سے کچھ حاصل نہیں ہوگا۔

اڈیالہ جیل کے قریب داہگل ناکے پر میڈیا سے گفتگو میں بیرسٹر گوہر کا کہنا تھا کہ ملاقات کرنا ہمارا حق ہے اور کئی عدالتی احکامات بھی موجود ہیں۔ انہوں نے کہا کہ آج بھی ہمیں جیل جانے سے روکا گیا ہے اور حالات کشیدہ ہو رہے ہیں، یہ ملک مزید انتشار کا متحمل نہیں ہو سکتا۔

سیلفی لیتے ہوئے 130 فٹ اونچی چٹان سے گرنے والا سیاح معجزاتی طور پر محفوظ

انہوں نے کہا کہ سیاست میں اختلاف ہوتا ہے، دشمنی نہیں ہوتی۔ سیاست میں ایک دوسرے کو غلط الفاظ سے نہیں پکارا جاتا۔ ان کا کہنا تھا کہ ہم خود بھی اپنے اندر بہت ساری چیزوں میں اصلاح چاہتے ہیں۔ ملاقاتیں ہوں گی تو حالات میں بہتری آ سکتی ہے، اور جب ہم بانی سے ملیں گے تو انہیں باہر کی صورتحال سے صحیح سے آگاہی ملے گی۔

بیرسٹر گوہر کا کہنا تھا کہ ملاقاتوں میں رکاوٹیں ڈالنے سے کچھ نہیں ہوگا۔ انہوں نے کہا کہ اسپیکر قومی اسمبلی نے ہمیشہ اچھا کردار ادا کیا ہے۔ ان کا یہ بھی کہنا تھا کہ بانی پی ٹی آئی نے بات چیت کا سارا اختیار محمود اچکزئی اور راجہ ناصر عباس کو دیا ہے۔

انہوں نے مزید کہا کہ کچھ دن پہلے ہم ایسی پوزیشن پر پہنچ گئے تھے شاید کوئی ڈائیلاگ ہو جاتا۔ ان کا کہنا تھا کہ سیاسی مسائل کا حل سیاسی طریقے سے نکلنا چاہیے، اور حالات کشیدگی کی طرف نہیں جانے چاہئیں۔ انہوں نے کہا کہ یہاں پارلیمنٹ ہے، دیگر ادارے ہیں، ایک طریقے سے چلنا چاہیے۔ ان کا کہنا تھا کہ ہم نے بڑی کوشش کی کہ سسٹم میں رہ کر کوئی تبدیلی لائیں، کیونکہ ہیجان کی وجہ سے لوگ مایوسی کی طرف جائیں گے۔ انہوں نے کہا کہ پاکستان نے اپنے سے پانچ گنا بڑے دشمن کو شکست دی ہے اور ہم نے فوج کو سراہا ہے۔