عمران خان کا حلقے میں ری الیکشن کا مطالبہ

اسلام آباد میں پریس کانفرنس کے دوران عمران خان نے کہا کہ کراچی کے الیکشن میں ہارا ہوں کیونکہ پیپلز پارٹی نے اپنی روایت کے مطابق کھل کر دھاندلی کی۔

انہوں نے کہا کہ سندھ کا الیکشن کمشنر صوبائی حکومت کے پے رول پر تھا جبکہ مرکزی الیکشن کمشنر سکندر سلطان ن لیگ کا خاص آدمی ہے۔

پی ٹی آئی چیئرمین نے مزید کہا کہ حکومت میں شامل تمام جماعتوں نے مل کر الیکشن لڑا، این اے 237 کے نتائج کو نہیں مانتے، ری الیکشن کروایا جائے۔

ان کا کہنا تھا کہ سب کو پتا تھا کہ ہم نے اسمبلی میں نہیں بیٹھنا ہے، اس کے باوجود ہمیں ووٹ ڈالے گئے کیونکہ قوم اس اسمبلی اور امپورٹڈ حکومت کو نہیں مانتی بلکہ وہ نئے الیکشن چاہتی ہے۔

عمران خان نے یہ بھی کہا کہ جنرل مشرف نے این آر او دے کر ملک کو سب سے زیادہ نقصان پہنچایا، انہیں دوبارہ مسلط کرکے این آر او دلوایا گیا ہے، اداروں سے کہتا ہوں جتنی دیر یہ حکومت رہےگی، ملک نیچے جائےگا۔