راولپنڈی میں ڈینگی مچھر کے حملے تاحال قابو میں نہیں آ سکے، شہر کے مختلف علاقوں میں مریضوں کی تعداد میں مسلسل اضافہ ہورہا ہے۔
ڈسٹرکٹ ہیلتھ اتھارٹی کے مطابق مختلف اسپتالوں میں ڈینگی کے 31 مریض زیر علاج ہیں، تاہم خوش آئند بات یہ ہے کہ کسی قسم کی اموات رپورٹ نہیں ہوئیں۔
بٹ کوائن کی قیمت ایک لاکھ ڈالر سے بھی نیچے آگیا
اعداد و شمار کے مطابق رواں سال اب تک 21 ہزار 440 افراد کی اسکریننگ کی گئی ہے، جن میں سے 1409 افراد میں ڈینگی وائرس کی تصدیق ہوئی۔ ڈی ایچ او راولپنڈی ڈاکٹر جواد کے مطابق انسدادِ ڈینگی مہم کے تحت ویکٹر سرویلنس ٹیمیں مختلف علاقوں میں سرگرم عمل ہیں۔
ہیلتھ اتھارٹی کے اعداد و شمار کے مطابق 1361 ٹیموں نے اب تک 62 لاکھ 73 ہزار 989 گھروں کی چیکنگ مکمل کی ہے، جن میں سے 2 لاکھ 4 ہزار 641 گھروں میں مچھر کے لاروا کی موجودگی پائی گئی۔ مزید بتایا گیا کہ 17 لاکھ 94 ہزار 718 مختلف مقامات کا معائنہ کیا گیا، جن میں 2 لاکھ 32 ہزار 874 جگہوں پر لاروا برآمد ہوا۔
ڈینگی ایس او پیز کی خلاف ورزی پر کارروائیاں بھی جاری ہیں۔ سی ای او ہیلتھ ڈاکٹر احسان غنی کے مطابق اب تک 4764 ایف آئی آرز درج، 1923 مقامات سیل، اور 3657 چالان کیے جا چکے ہیں، جن کے نتیجے میں 11 لاکھ روپے سے زائد کے جرمانے عائد کیے گئے۔
ضلعی انتظامیہ نے شہریوں پر زور دیا ہے کہ وہ گھروں اور اطراف کی صفائی برقرار رکھیں، پانی جمع نہ ہونے دیں، اور احتیاطی تدابیر پر عمل کریں تاکہ ڈینگی کے پھیلاؤ پر مؤثر قابو پایا جا سکے۔
