کاؤنٹر ٹیررازم ڈیپارٹمنٹ (سی ٹی ڈی) نے پنجاب میں ایک ماہ کے دوران 386 انٹیلیجنس بیسڈ آپریشنز کے نتیجے میں 18 دہشت گردوں کو گرفتار کر لیا۔
اسکول وین ڈرائیور کے قتل میں ملوث ملزم گرفتار
سی ٹی ڈی حکام کے مطابق دہشت گردی کے خدشات کے پیش نظر پنجاب کے مختلف شہروں میں کارروائیاں کی گئیں، جن میں لاہور، منڈی بہاؤالدین، خوشاب، بہاولپور، ٹوبہ ٹیک سنگھ، گوجرانوالہ، نارووال، پاک پتن اور بھکر شامل ہیں۔ ان کارروائیوں کے دوران ایک انتہائی خطرناک دہشت گرد تنظیم کا اہم رکن بھی گرفتار ہوا۔
حکام کا کہنا ہے کہ گرفتار دہشت گرد پنجاب کے ایک شہر میں بڑی کارروائی کی منصوبہ بندی مکمل کر چکے تھے۔ دہشت گردوں سے دھماکہ خیز مواد اور خودکش جیکٹ بنانے کا سامان بھی برآمد ہوا۔
سی ٹی ڈی کے مطابق رواں ماہ کے دوران 4601 کومبنگ آپریشنز کیے گئے جن میں 320 مشتبہ افراد کو گرفتار کیا گیا، جبکہ 109892 افراد سے پوچھ گچھ بھی کی گئی۔
گرفتار دہشت گردوں کی شناخت محمد کریم، علی رضا، محمد عزیز، محمد علی، ہاشم، نورالامین، سلیم اور صدام وغیرہ کے ناموں سے ہوئی ہے۔ حکام کے مطابق یہ دہشت گرد مختلف مقامات پر کارروائیاں کر کے عوام میں خوف و ہراس پھیلانے کی منصوبہ بندی کر رہے تھے۔
