وفاقی حکومت نے سرکاری ملازمین کے لیے اہم فیصلہ کرتے ہوئے ہاؤس رینٹ سیلنگ میں 85 فیصد اضافے کی منظوری دے دی۔ ذرائع کے مطابق وزارتِ ہاؤسنگ اینڈ ورکس کی جانب سے ارسال کردہ سمری کو وفاقی کابینہ نے باضابطہ طور پر سرکولیشن کے ذریعے منظور کیا۔
فیصلے کے تحت گریڈ ایک سے 22 تک کے تمام وفاقی ملازمین کے لیے ہاؤس رینٹ سیلنگ میں یکساں اضافہ کیا گیا ہے۔ اس اضافے سے قومی خزانے پر تقریباً 12 ارب روپے کا مالی بوجھ پڑے گا، تاہم اس اقدام سے وفاقی ملازمین کو بڑھتی ہوئی مہنگائی کے دوران نمایاں ریلیف ملنے کی توقع ہے۔
ذرائع کے مطابق یہ اضافہ سرکاری ملازمین کا ایک دیرینہ مطالبہ تھا، جو اب پورا ہو گیا ہے۔ اس فیصلے سے رہائش کے بڑھتے اخراجات کے بوجھ میں خاطر خواہ کمی آئے گی اور ملازمین کے معیارِ زندگی میں بہتری کی امید کی جا رہی ہے۔
