پنجاب حکومت نے صوبے کی ترقی کے لیے 36 ارب روپے کے نئے منصوبوں کی منظوری دے دی ہے۔ ترجمان پلاننگ اینڈ ڈیولپمنٹ بورڈ کے مطابق چیئرمین ڈاکٹر نعیم رؤف کی زیر صدارت صوبائی ترقیاتی ورکنگ پارٹی کے 39 ویں اجلاس میں مختلف شعبوں کے منصوبے منظور کیے گئے۔
خیبرپختونخوا؛ حکومت اور اپوزیشن صوبے میں قیام امن کیلئے ایک پیج پر
اعلامیے کے مطابق پوٹھوہار ریجن میں زراعت کے فروغ کے لیے 7 ارب 30 کروڑ روپے، مری کے کشمیر بازار کی توسیع کے لیے 2 ارب 70 کروڑ روپے، جبکہ نارووال سے شکر گڑھ کے درمیان گرلز ڈگری کالج کوٹ نائینان تک سڑک کی تعمیر و مرمت کے لیے 1 ارب 14 کروڑ روپے کے فنڈز کی منظوری دی گئی۔
اجلاس میں پنجاب انکلوسیو سٹیز پروگرام کے تحت واٹر اینڈ سینیٹیشن سہولیات کے لیے 7 ارب روپے، ساہیوال نارتھ زون میں واٹر سپلائی اور سیوریج نظام کی بہتری کے لیے 12 ارب 94 کروڑ روپے، ساہیوال ساؤتھ زون کے سیوریج سسٹم کی اپ گریڈیشن کے لیے 4 ارب 49 کروڑ روپے، جبکہ ضلع ساہیوال میں سڑکوں کی تعمیر و مرمت کے لیے 41 کروڑ روپے کے منصوبے منظور کیے گئے۔
مزید برآں، فیصل آباد ماس ٹرانزٹ سسٹم کے سیڈ منی منصوبے کو حتمی منظوری کے لیے مرکزی ترقیاتی ورکنگ پارٹی (CDWP) کو بھیجنے کا فیصلہ کیا گیا۔ اجلاس میں "چیف منسٹر پنجاب ہائی پاور ٹریکٹر پروگرام 2025–26” کے پوزیشن پیپر کے ساتھ ساتھ جنوبی پنجاب میں کھجور کے باغات کے فروغ، فصلوں کی رپورٹنگ سروسز اور لینڈ فورکاسٹ انفارمیشن سسٹم سے متعلق منصوبوں کی بھی منظوری دی گئی۔
