اگر آپ فالج یا دل کے دورے جیسے جان لیوا امراض سے ہمیشہ کے لیے محفوظ رہنا چاہتے ہیں تو روزانہ محض 10 سے 15 منٹ کی چہل قدمی آپ کے لیے معجزہ ثابت ہوسکتی ہے۔
آسٹریلیا کی سڈنی یونیورسٹی میں ہونے والی ایک طبی تحقیق کے مطابق روزانہ تھوڑا زیادہ وقت تک مسلسل چہل قدمی کرنے سے امراضِ قلب، بشمول ہارٹ اٹیک اور فالج کا خطرہ دو تہائی تک کم ہوجاتا ہے۔
سندھ بھر میں 6 لاکھ سے زائد عطائی ڈاکٹروں کا انکشاف
تحقیق میں 40 سے 79 سال کی عمر کے 33 ہزار سے زائد افراد کو شامل کیا گیا جو دن بھر میں 8 ہزار سے کم قدم چلنے کے عادی تھے اور ان میں سے کسی کو دل کے امراض یا کینسر لاحق نہیں تھا۔ محققین نے ان کی جسمانی سرگرمیوں کو ایک ہفتے تک رسٹ بینڈز کے ذریعے مانیٹر کیا اور اگلے 8 سال تک ان کی صحت کا مشاہدہ کیا۔
نتائج میں سامنے آیا کہ جو افراد روزانہ 10 سے 15 منٹ تک مسلسل چہل قدمی کرتے تھے، ان میں ہارٹ اٹیک یا فالج کا خطرہ صرف 4 فیصد تھا، جبکہ روزانہ 5 منٹ سے کم چلنے والوں میں یہ خطرہ 13 فیصد تک پہنچ گیا۔ سب سے زیادہ فائدہ ان لوگوں کو ہوا جو عام طور پر کم متحرک تھے اور روزانہ 5 ہزار سے کم قدم چلتے تھے، ان میں بھی مسلسل 15 منٹ چہل قدمی سے دل کے امراض کا خطرہ نصف رہ گیا۔
محققین کے مطابق روزمرہ زندگی میں معمولی تبدیلیاں — جیسے کہ روزانہ چند منٹ چہل قدمی — دل کی صحت کو بہتر بنانے میں اہم کردار ادا کر سکتی ہیں۔ تحقیق کے نتائج **Annals of Internal Medicine** میں شائع کیے گئے۔
اسی موضوع پر اکتوبر 2025 میں **برٹش جرنل آف اسپورٹس میڈیسن** میں شائع ایک اور تحقیق میں بتایا گیا کہ صحت مند رہنے کے لیے روزانہ 7 سے 10 ہزار قدم چلنا ضروری نہیں۔ اگر آپ ہفتے میں ایک یا دو دن بھی چند ہزار قدم چلیں تو امراضِ قلب سے موت کا خطرہ نمایاں حد تک کم ہوجاتا ہے۔
اس تحقیق میں 13 ہزار سے زائد خواتین شامل تھیں جن کی اوسط عمر 71 سال تھی۔ 11 سال کے دوران تحقیق سے معلوم ہوا کہ ہفتے میں صرف دو دن 4 ہزار قدم چلنے والی خواتین میں موت کا خطرہ 26 فیصد اور امراضِ قلب سے موت کا خطرہ 27 فیصد کم ہوگیا۔ ہفتے میں تین دن چہل قدمی کرنے سے یہ خطرہ مزید کم ہوکر 40 فیصد تک جا پہنچا۔
ماہرین کا کہنا ہے کہ دل کی صحت کے لیے سخت ورزش ضروری نہیں، بلکہ روزانہ چند منٹ کی باقاعدہ چہل قدمی بھی زندگی کو محفوظ، متحرک اور طویل بنا سکتی ہے۔
