وزیراعلیٰ پنجاب مریم نواز نے صوبے کی 65 ہزار مساجد کے آئمہ کرام کے لیے وظیفہ مقرر کرنے کا فیصلہ کیا ہے۔ یہ فیصلہ ان کی زیر صدارت امن و امان سے متعلق اجلاس میں کیا گیا۔
اجلاس میں حکام نے بریفنگ دیتے ہوئے بتایا کہ حکومت کے حالیہ اقدامات کو مذہبی حلقوں کی جانب سے سراہا جا رہا ہے، جبکہ صوبے بھر کی مساجد میں نماز جمعہ اور دیگر نمازیں باجماعت ادا کی جا رہی ہیں۔
اسلام آباد میں پٹرول پمپ پر ڈکیتی کی بڑی واردات
مریم نواز نے کہا کہ امام مسجد معاشرے کا باعزت اور محترم فرد ہوتا ہے، اس لیے محلے کی سطح پر چندہ اکٹھا کر کے امام مسجد کو ادائیگی مناسب نہیں۔ انہوں نے کہا کہ حکومت کو چاہیے کہ وہ آئمہ کرام کی ضروریات کے لیے معاشی معاونت فراہم کرے تاکہ وہ بہتر طور پر اپنے فرائض انجام دے سکیں۔
وزیراعلیٰ نے ہدایت کی کہ مساجد کی تعمیر و مرمت کے منصوبوں کو سالانہ ترقیاتی پروگرام میں شامل کیا جائے اور ان کی جلد تکمیل یقینی بنائی جائے۔
تبلیغی اجتماع سے متعلق بریفنگ میں بتایا گیا کہ رائے ونڈ کی رابطہ سڑکوں کی تعمیر و مرمت مکمل کر لی گئی ہے اور اجتماع کے لیے خصوصی بس سروس بھی شروع کی جائے گی۔
مریم نواز کی ہدایت پر رائے ونڈ اجتماع کے دوران سکیورٹی کے فول پروف انتظامات کیے گئے ہیں۔
اجلاس میں پنجاب میں سائبر کرائم سیل قائم کرنے کا بھی اصولی فیصلہ کیا گیا، جبکہ لاؤڈ اسپیکر کے غیر قانونی استعمال کے خلاف سخت کارروائی کی ہدایت دی گئی۔
