پاکستان تحریک انصاف (پی ٹی آئی) کے رکن قومی اسمبلی عمر ایوب خان کی نااہلی کے بعد خالی ہونے والی نشست این اے-18 ہری پور پر ضمنی انتخاب کے لیے ریٹرننگ افسر نے امیدواروں کی حتمی فہرست جاری کر دی ہے، جہاں پی ٹی آئی اور مسلم لیگ (ن) کے درمیان سخت مقابلہ متوقع ہے۔
ریٹرننگ افسر نوید الرحمان کی جانب سے اسکروٹنی مکمل ہونے کے بعد فارم 32 جاری کیا گیا ہے، جس کے مطابق 13 امیدواروں کے کاغذات نامزدگی درست قرار دیے گئے ہیں جبکہ ایک امیدوار کے کاغذات مسترد کر دیے گئے ہیں۔
وزیر داخلہ نے مدارس یا مساجد کی بندش کو پروپیگنڈہ قرار دیدیا
فہرست میں شامل امیدواروں میں پاکستان پیپلزپارٹی کی ارم فاطمہ ترک، مسلم لیگ (ن) کے بابر نواز خان، پیر صابر شاہ، سردار محمد مشتاق، صاحبزادہ حامد شاہ اور پی ٹی آئی کی شہرناز عمر ایوب شامل ہیں، جن کے کاغذات نامزدگی منظور کر لیے گئے ہیں۔
ریٹرننگ افسر نے ہری پور کے یو سی چیئرمین عبدالرشید تنولی کے کاغذات مسترد کر دیے ہیں۔
اس سے قبل پی ٹی آئی نے مسلم لیگ (ن) کے امیدوار بابر نواز خان پر اعتراضات جمع کرائے تھے، تاہم ریٹرننگ افسر نے تمام اعتراضات مسترد کر دیے۔
قومی اسمبلی کے حلقے این اے-18 ہری پور میں ضمنی انتخاب 23 نومبر کو ہوگا، جہاں پی ٹی آئی کی شہرناز عمر ایوب اور مسلم لیگ (ن) کے بابر نواز خان کے درمیان سخت مقابلے کی توقع کی جا رہی ہے۔
یہ نشست سابق اپوزیشن لیڈر عمر ایوب خان کی 9 مئی کے مقدمات میں سزا اور نااہلی کے باعث خالی ہوئی تھی۔
