ایشین کرکٹ کونسل (اے سی سی) کے صدر محسن نقوی نے ایشیا کپ کی ٹرافی سے متعلق بھارتی کرکٹ بورڈ (بی سی سی آئی) کے خط کا جواب دے دیا ہے۔
ذرائع کے مطابق بی سی سی آئی نے ایشیا کپ 2025 کی ٹرافی وصول کرنے کے لیے محسن نقوی کو باضابطہ خط لکھا تھا، جس میں درخواست کی گئی تھی کہ ٹرافی بھارتی ٹیم کو فراہم کی جائے۔
محمود خان اچکزئی قومی اسمبلی میں اپوزیشن لیڈر نامزد
جواب میں محسن نقوی نے واضح کیا کہ اگر ٹرافی درکار ہے تو اس کے لیے ایک باضابطہ تقریب منعقد کی جا سکتی ہے، جس میں بھارتی نمائندے آ کر ٹرافی وصول کریں۔
ذرائع کے مطابق ایشین کرکٹ کونسل نے بھارتی بورڈ کو آگاہ کر دیا ہے کہ ٹرافی 10 نومبر کو دی جا سکتی ہے، اور اس حوالے سے اسی تاریخ کو تقریب منعقد کرنے کی تجویز دی گئی ہے۔
مزید بتایا گیا ہے کہ محسن نقوی نے اپنے مؤقف میں کہا کہ بی سی سی آئی کے عہدیدار کسی ایک کھلاڑی کے ہمراہ تقریب میں شرکت کر کے ٹرافی وصول کر سکتے ہیں۔
یاد رہے کہ ایشیا کپ 2025 کے فائنل میں بھارتی ٹیم کے جیتنے کے باوجود کپتان نے اے سی سی کے صدر محسن نقوی سے ٹرافی وصول نہیں کی تھی، جس کے بعد محسن نقوی نے ٹرافی واپس اے سی سی کے دفتر بھجوا دی تھی۔
اس سے قبل محسن نقوی نے واضح مؤقف اختیار کرتے ہوئے کہا تھا کہ اگر بھارتی کپتان کو ٹرافی چاہیے تو وہ میرے دفتر آ کر خود لے جائیں۔
