فیلڈ مارشل کی قیادت میں پاک فوج نے افغانستان کو بھرپور جواب دیا، متعدد پوسٹیں تباہ کرکے انہیں پسپائی پر مجبور کیا: وزیراعظم

اسلام آباد: وزیراعظم شہباز شریف نے افغانستان کی جانب سے سرحدی علاقوں میں اشتعال انگیزی کی شدید مذمت کرتے ہوئے پاک فوج کی بھرپور جوابی کارروائی کو سراہا ہے۔

اپنے بیان میں وزیراعظم نے کہا کہ پاک افواج کی پیشہ ورانہ مہارت پر پوری قوم کو فخر ہے۔ فیلڈ مارشل کی جرات مندانہ قیادت میں پاک فوج نے افغانستان کو مؤثر اور بھرپور جواب دیا، دشمن کی متعدد پوسٹس تباہ کی گئیں اور انہیں پسپائی پر مجبور کیا گیا۔

شہباز شریف نے واضح کیا کہ پاکستان کے دفاع پر کوئی سمجھوتہ نہیں ہوگا اور ہر اشتعال انگیزی کا بھرپور اور مؤثر جواب دیا جائے گا۔

انہوں نے کہا کہ ہمارا دفاع مضبوط ہاتھوں میں ہے، پاک فوج نے ہمیشہ ہر قسم کی بیرونی جارحیت کا منہ توڑ جواب دیا ہے اور پوری قوم اپنی سیکیورٹی فورسز کے ساتھ کھڑی ہے۔

وزیراعظم نے مزید کہا کہ دہشت گرد تنظیموں کو افغانستان میں موجود بعض عناصر کی حمایت حاصل ہے۔ پاکستان کئی بار افغان حکومت کو ان گروہوں کے بارے میں معلومات فراہم کر چکا ہے جو افغان سرزمین سے پاکستان کے خلاف کارروائیاں کرتے ہیں۔

انہوں نے امید ظاہر کی کہ افغان حکومت اس بات کو یقینی بنائے گی کہ اس کی سرزمین پاکستان کے خلاف استعمال نہ ہو۔