حکومت نے آئی ایم ایف سے کرپشن اینڈ گورننس رپورٹ پبلش کرنے کےلئے مہلت مانگ لی

اسلام آباد (آئی پی ایس): حکومت نے آئی ایم ایف سے کرپشن اینڈ گورننس رپورٹ پبلش کرنے کے لیے مہلت مانگ لی ہے۔

رپورٹ کے مطابق سیلاب کے باعث صوبوں نے زرعی آمدن پر انکم ٹیکس نافذ کرنے کے لیے بھی مزید وقت طلب کیا ہے۔ سیلاب سے زرعی معیشت بری طرح متاثر ہوئی ہے، جس کے باعث صوبے فوری طور پر ایگریکلچر انکم ٹیکس کے نفاذ پر آمادہ نہیں ہیں۔

ذرائع کے مطابق پاکستان اور آئی ایم ایف کے درمیان اسٹاف لیول معاہدے کے لیے چار اہم نکات پر ورچوئل مذاکرات جاری ہیں۔ ان مذاکرات میں سرکاری افسران کے اثاثے ظاہر کرنے اور کرپشن اینڈ گورننس ڈائیگناسٹک اسیسمنٹ رپورٹ کے نکات بھی شامل ہیں۔

حکومت نے کرپشن اینڈ گورننس رپورٹ کی اشاعت کے لیے مہلت طلب کی ہے، جب کہ آئی ایم ایف نے مطالبہ کیا ہے کہ سرکاری سطح پر گندم کی خریداری کے لیے اوپن مارکیٹ یا نجی شعبے سے خریداری کا شفاف میکنزم فراہم کیا جائے۔

ذرائع کا کہنا ہے کہ پاکستان کی معاشی ٹیم نے اسٹرکچرل بنچ مارکس میں نرمی کی درخواست بھی کی ہے تاکہ اسٹاف لیول معاہدہ جلد از جلد مکمل ہو سکے۔