وفاقی وزیر خزانہ محمد اورنگزیب آئی ایم ایف اور ورلڈ بینک کے سالانہ اجلاسوں میں شرکت کے لیے امریکا روانہ ہو گئے۔
چھ روزہ دورے کے دوران وہ پاکستان کی نمائندگی کرتے ہوئے عالمی مالیاتی اداروں کے اعلیٰ حکام سے اہم ملاقاتیں کریں گے۔
وزیر خزانہ آئی ایم ایف، ورلڈ بینک، انٹرنیشنل فنانس کارپوریشن (IFC) اور ملٹی لیٹرل انویسٹمنٹ گارنٹی ایجنسی (MIGA) کے سربراہان سے ملاقات کریں گے، جب کہ ان کی عالمی بینک کے صدر اجے بنگا سے بالمشافہ ملاقات بھی طے ہے۔ وہ اجے بنگا کی خصوصی دعوت پر مختلف ممالک کے وزرائے خزانہ کے اعزاز میں دیے گئے عشائیے میں بھی شریک ہوں گے۔
محمد اورنگزیب G24 اور مشرق وسطیٰ، شمالی افریقا اور پاکستان (MENAP) ممالک کے پلیٹ فارم پر آئی ایم ایف کی منیجنگ ڈائریکٹر کرسٹلینا جارجیوا سے بھی ملاقات کریں گے، جہاں وہ کلیدی مقرر کے طور پر خطاب کریں گے۔
وہ ایف بی آر کی ڈیجیٹل ٹرانسفارمیشن سے متعلق عالمی بینک کے زیر اہتمام علاقائی راؤنڈ ٹیبل میں بھی شرکت کریں گے، جہاں مختلف ممالک کے ٹیکس حکام اپنی اصلاحاتی پیش رفت پیش کریں گے۔
علاوہ ازیں وزیر خزانہ ورلڈ اکنامک فورم کے دو اہم پروگراموں میں شرکت کریں گے اور چین، سعودی عرب، ترکیہ، آذربائیجان اور برطانیہ کے اپنے ہم منصبوں سے ملاقاتیں بھی کریں گے۔
دورے کے دوران محمد اورنگزیب کی وائٹ ہاؤس، امریکی محکمہ خزانہ اور اسٹیٹ ڈیپارٹمنٹ کے اعلیٰ حکام سے ملاقاتیں بھی ہوں گی۔ وہ کانگریس کی فنانشل سروسز کمیٹی کے چیئرمین اور یو ایس پاکستان بزنس کونسل کے نمائندوں سے بھی ملاقات کریں گے تاکہ پاکستان میں سرمایہ کاری کے مواقع اور ٹیکس تجاویز پر بات چیت کی جا سکے۔
وزیر خزانہ عالمی کریڈٹ ریٹنگ ایجنسیوں، بین الاقوامی کمرشل بینکوں اور مشرقِ وسطیٰ کے سرمایہ کار بینکوں کے نمائندوں سے بھی ملاقاتیں کریں گے۔
مزید برآں وہ معروف تھنک ٹینکس جیسے اٹلانٹک کونسل اور پیٹرسن انسٹی ٹیوٹ آف انٹرنیشنل اکنامکس کا دورہ کریں گے، جہاں مختلف سرمایہ کاری فورمز اور سیمینارز میں پاکستان کی معاشی ترقی کے امکانات پر گفتگو کریں گے۔
محمد اورنگزیب اپنے دورے کے دوران 65 سے زائد ایونٹس، اجلاسوں اور ملاقاتوں میں شرکت کریں گے، جن میں پاکستانی کمیونٹی کے سرکردہ افراد سے ملاقاتیں اور بین الاقوامی میڈیا کو انٹرویوز دینا بھی شامل ہے۔
