بانی پاکستان تحریک انصاف (پی ٹی آئی) عمران خان کی ہدایت پر اعظم سواتی سمیت 4 سینیٹرز قائمہ کمیٹیوں سے مستعفی ہوگئے۔پی ٹی آئی سینیٹر دوست محمد اور سینیٹر ذیشان خانزادہ سینیٹ کی قائمہ کمیٹیوں سے مستعفی ہوئے۔ انہوں نے اپنا استعفیٰ چیئرمین سینیٹ یوسف رضا گیلانی کو ارسال کر دیا۔پی ٹی آئی سینیٹر دوست محمد اور ذیشان خانزادہ نے احتجاجاً 5 کمیٹیوں کی رکنیت سے استعفیٰ دیا۔
دوست محمد نے کہا کہ استعفیٰ بانی پی ٹی آئی عمران خان کی ہدایت پر دیا ہے جبکہ زیشان خانزادہ بولے کہ احتجاج کے طور پر کمیٹیوں کی رکنیت سے استعفیٰ دیا ہے۔بعدازاں، اعظم سواتی اور مرزا آفریدی بھی قائمہ کمیٹیوں سے مستعفی ہوگئے۔پچھلے دنوں عمران خان سے جیل میں ملاقات کے بعد ان کی ہمشیرہ علیمہ خانم نے میڈیا کو بتایا کہ بانی پی ٹی آئی نے پارٹی کو قومی اسمبلی کی قائمہ کمیٹیوں سے مستعفی ہونے کی ہدایت کی ہے۔
علیمہ خانم نے اپنے بیان میں کہا تھا کہ عمران خان کی اہلیہ بشریٰ بی بی کو قید تنہائی میں رکھا گیا ہے، ملاقات میں بھائی نے میرے بچوں کا پوچھا کہ کیا انہیں بھی جیل میں ڈال دیا گیا ہے۔بانی پی ٹی آئی کی ہمشیرہ کا کہنا تھا کہ ہم بہنوں کی 4 ماہ بعد بھائی سے ملاقات کرائی گئی، ان کی صحت بہت اچھی ہے تاہم آنکھ پر تھوڑا پریشر محسوس ہو رہا ہے۔ان کا کہنا تھا کہ جیل میں بانی پی ٹی آئی کی آنکھ کے معائنے کیلیے عدالت میں درخواست دیں گے۔
