پنجاب کے دریاؤں میں خوفناک سیلابی صورتحال برقرار ہے،دریائے چناب ہیڈ پنجند پر پانی کا بہاؤ چھ لاکھ نو ہزار کیوسک سے تجاوز کرگیا،جلال پور پیر والا میں بند ٹوٹ گئے،درجنوں بستیاں زیرآب آگئیں، علاقے میں ایمرجنسی نافذ کردی گئی۔
جلال پورپیروالامیں رات بھرسےریسکیو آپریشن جاری ہے،وزیراعلیٰ پنجاب نےرات بھرانخلا آپریشن کی براہ راست نگرانی کی،آپریشن کےدوران143افرادکوریسکیوکرلیاگیا،گزشتہ 24گھنٹوں میں ملتان سے 2343 افرادکو ریسکیو کیا جاچکا ہے، اب تک10ہزار810 لوگوں کو ملتان کے متاثرہ علاقوں سےنکالا جاچکا،ضلعی انتظامیہ ساڑھے3 لاکھ افراد،3 لاکھ سے زائدجانوروں کو نکال چکی،پنجاب بھر کے سیلاب متاثری علاقوں سے 20 لاکھ افراد،15 لاکھ جانوروں کا انخلا کرواچکی ہے۔
منہ زورریلوں سےمظفرگڑھ کی تحصیل علی پورمیں کئی دیہات پانی میں ڈوب گئے، خیرپورٹا میوالی میں دریائے ستلج بپھرگیا، موضع فضلو کوکارا کا حفاظتی بند ٹوٹ گیا، رحیم یارخان اور لیاقت پور میں ہزاروں ایکڑ فصلیں متاثر ہیں۔
حکام کےمطابق چندگھنٹوں میں بڑا ریلا راجن پورکوٹ مٹھن کےمقام سےگزرے گا،ہیڈ تریموں پرپانی کا بہاؤ پانچ لاکھ تینتالیس ہزارکیوسک تک جا پہنچا،ہیڈ سلیمانکی،ہیڈ بلوکی اور سدھنائی پر بھی اونچے درجے کا سیلاب ہے۔
ہیڈ محمد والا پر پانی کا بہاؤ 4 لاکھ کیوسک ریکارڈ کیا جارہا ہے،ہیڈتریموں سے پانی کا بڑا ریلا آج ملتان پہنچےگا،ڈی جی پی ڈی ایم اے کا کہنا ہے کہ ملتان میں آئندہ تین روز تک سیلابی صورتحال برقرار رہےگی۔
