کموڈور سہیل احمد عزمی نے پاک بحریہ کے کمانڈر سینٹرل پنجاب (COMCEP) کا عہدہ سنبھال لیا ہے۔ کمان کی تبدیلی کی تقریب 21 اگست 2025 کو نیول کمپلیکس والٹن، لاہور میں منعقد ہوئی، جہاں ریئر ایڈمرل جواد احمد نے کمان کی ذمہ داریاں کموڈور سہیل احمد عزمی کے سپرد کیں۔
کموڈور سہیل احمد عزمی 1996 میں پاک بحریہ کی آپریشنز برانچ میں کمیشن حاصل کرنے کے بعد مختلف اہم کمانڈ اور اسٹاف عہدوں پر خدمات انجام دے چکے ہیں۔ ان کی تعیناتیوں میں پی این ایس نصر کے کمانڈنگ آفیسر، کمانڈر 9 آگزلیری اسکواڈرن، کمانڈنٹ پاکستان نیول اکیڈمی، پاکستان نیوی وار کالج میں ڈائریکٹنگ اسٹاف، ڈپٹی کمانڈنٹ و چیف انسٹرکٹر، اور بحرین میں کمانڈر کمبائنڈ ٹاسک فورس 151 جیسے اہم عہدے شامل ہیں۔ وہ اسسٹنٹ چیف آف نیول اسٹاف (آپریشنل پلانز) بھی رہ چکے ہیں۔
کموڈور سہیل احمد عزمی پاکستان نیوی وار کالج لاہور اور نیشنل ڈیفنس یونیورسٹی اسلام آباد سے فارغ التحصیل ہیں۔ ان کی نمایاں پیشہ ورانہ خدمات کے اعتراف میں انہیں ستارہ امتیاز (ملٹری) سے نوازا گیا ہے۔
تقریب کے دوران انہیں گارڈ آف آنر پیش کیا گیا، اور پاکستان نیوی وار کالج و ہیڈ کوارٹرز کے اسٹاف افسران سے تعارف بھی کرایا گیا۔ وہ بہاولپور سے وزیر آباد تک کے علاقے میں پاک بحریہ کی تمام یونٹس اور تنصیبات کے کمانڈر اور کمانڈنٹ پاکستان نیوی وار کالج لاہور کی حیثیت سے فرائض انجام دیں گے۔
تقریب میں پاک بحریہ کے افسران، چیف پیٹی آفیسرز، سیلرز اور سویلینز کی بڑی تعداد شریک ہوئی۔
