پاک فضائیہ نے گلگت بلتستان کے سیلاب سے متاثرہ علاقوں میں بڑے پیمانے پر ریلیف آپریشن سرانجام دیا۔ سی-130 طیارے کے ذریعے 7 ٹن خشک راشن، اشیائے خوردونوش اور ضروری ادویات نور خان ایئر بیس سے گلگت بلتستان پہنچائی گئیں، جنہیں نیشنل ڈیزاسٹر مینجمنٹ اتھارٹی کے تعاون سے دور دراز علاقوں میں تقسیم کیا جائے گا۔
شدید موسمی حالات اور دشوار گزار پہاڑی علاقوں کے باوجود پاک فضائیہ نے متاثرہ علاقوں تک امدادی سامان بروقت پہنچا کر زمینی رابطے منقطع ہونے کے باوجود پریشان حال خاندانوں کو ریلیف فراہم کیا۔ انسانی ہمدردی کی بنیاد پر جاری اس آپریشن کے دوران پاک فضائیہ کی ٹیموں نے سیلاب میں پھنسے 75 افراد کو بھی محفوظ مقامات پر منتقل کیا۔
یہ ریلیف آپریشن افواج پاکستان کی ملک گیر ہنگامی امدادی مہم کا حصہ ہے، جس کا مقصد قدرتی آفات کے دوران قیمتی جانوں کا تحفظ اور بروقت امداد کی فراہمی ہے۔ آنے والے دنوں میں بھی پاک فضائیہ کے طیارے اور زمینی ٹیمیں متاثرہ علاقوں میں امدادی سرگرمیوں میں مصروف رہیں گی، جن میں خوراک، ادویات، عارضی رہائش اور طبی امداد کی فراہمی شامل ہے۔
پاک فضائیہ کی یہ بروقت، مربوط اور پرعزم کارروائی گلگت بلتستان کے متاثرہ خاندانوں کے لیے امید کی کرن ثابت ہوئی ہے اور اس بات کا مظہر ہے کہ افواج پاکستان آزمائش کی ہر گھڑی میں قوم کے ساتھ کھڑی ہے۔
