واپڈا اور گلگت بلتستان رورل سپورٹ پروگرام (GBRSP) کے اشتراک سے ٹیکنیکل اور ووکیشنل ٹریننگ پروگرام کے دوسرے مرحلے کا باقاعدہ آغاز ہو گیا ہے۔ اس مرحلے میں دیامر کے 171 نوجوانوں کو چھ مختلف شعبوں میں پیشہ ورانہ تربیت فراہم کی جائے گی۔
یہ تربیت چلاس کے ہرپن داس ماڈل ویلیج میں قائم ووکیشنل اینڈ ٹیکنیکل انسٹیٹیوٹ میں دی جائے گی، جو واپڈا اور جی بی آر ایس پی کے تعاون سے قائم کیا گیا ہے۔ تین ماہ پر مشتمل اس پروگرام کے دوران حزہ انسٹیٹیوٹ آف ٹیکنالوجی کے ماہر ٹرینرز نوجوانوں کو متعلقہ شعبہ جات میں نظریاتی اور عملی کلاسز کے ذریعے جدید تربیت فراہم کریں گے۔
خواہشمند امیدوار داخلے کے لیے اپنا رجسٹریشن فارم ووکیشنل اینڈ ٹیکنیکل انسٹیٹیوٹ ہرپن داس، واپڈا پراجیکٹ آفس ہرپن داس یا جی بی آر ایس پی دفتر چلاس سے حاصل کر سکتے ہیں۔
اس پروگرام کا بنیادی مقصد دیامر کے نوجوانوں کو جدید فنی مہارتیں فراہم کرنا ہے تاکہ وہ قومی اور بین الاقوامی مارکیٹ کے تقاضوں کے مطابق ایک باصلاحیت اور ہنر مند افرادی قوت کے طور پر ابھریں۔ اس اقدام سے نوجوانوں کو میگا پراجیکٹس میں روزگار کے بہتر مواقع میسر آئیں گے۔
قابلِ ذکر امر یہ ہے کہ واپڈا اب تک اپنے مختلف شراکتی اداروں کے تعاون سے دیامر کے 400 سے زائد نوجوانوں کو مختلف تکنیکی شعبوں میں تربیت فراہم کر چکا ہے، جن میں سے کئی آج مختلف ترقیاتی منصوبوں میں کامیابی سے خدمات انجام دے رہے ہیں۔
