اسلام آباد – خواجہ آصف کے ایک حالیہ بیان یا سوشل میڈیا پوسٹ نے ملکی سیاسی اور بیوروکریسی حلقوں میں ہلچل مچا دی ہے۔ انہوں نے انکشاف کیا کہ گزشتہ دس سالوں میں پاکستانیوں کے اربوں ڈالر پرتگال کے رئیل اسٹیٹ پراجیکٹس میں منتقل کیے گئے۔ پرتگال میں سرمایہ کاری کی بنیادی وجہ وہاں کی "گولڈن ویزا” اسکیم تھی، جس کے تحت غیر ملکی سرمایہ کار یورپی یونین کی شہریت حاصل کر سکتے تھے۔
خواجہ آصف نے دعویٰ کیا کہ اسلام آباد، لاہور اور کراچی میں اعلیٰ سول و ملٹری بیوروکریٹس کی ایک بڑی تعداد نے پرتگال میں جائیدادیں خریدی ہیں اور وہ شہریت حاصل کرنے کی تیاری میں ہیں۔ ان بیوروکریٹس میں کئی بڑے اور بااثر نام شامل ہیں، جنہوں نے مبینہ طور پر اربوں روپے غیر قانونی ذرائع سے کما کر بیرون ملک منتقل کیے۔
انہوں نے مطالبہ کیا کہ حکومت فوری طور پر آئی ایس آئی، نیب، اور ایف آئی اے پر مشتمل ایک اعلیٰ سطحی تحقیقاتی کمیٹی تشکیل دے جو پرتگال جا کر پاکستانی سرمایہ کاری کی مکمل چھان بین کرے۔
فواد چوہدری نے بھی خواجہ آصف کی پوسٹ پر ردعمل دیتے ہوئے کہا کہ یہ معاملہ سنجیدہ نوعیت کا ہے اور اس پر فوری ایکشن لیا جانا چاہیے۔
مطالبہ کیا گیا ہے کہ تمام گریڈ 19 اور اس سے اوپر کے افسران سے حلف لیا جائے کہ ان کی یا ان کے خاندان کی بیرون ملک کوئی جائیداد یا مفاد موجود نہیں۔ جھوٹا حلف جرم تصور کیا جائے
