**خیبر پختونخوا میں ای سمری کا اجرا، دفتری نظام پیپر لیس بنانے کی جانب اہم قدم**
خیبر پختونخوا حکومت نے دفتری امور کو جدید خطوط پر استوار کرنے کی جانب اہم پیشرفت کرتے ہوئے **ای سمری سسٹم** کا آغاز کر دیا ہے۔ اس نظام کے تحت اب سرکاری سمریاں کاغذ کی بجائے **ڈیجیٹل فارمیٹ** میں تیار اور ارسال کی جا رہی ہیں۔
حال ہی میں صوبے میں پہلی مرتبہ ایک سرکاری سمری کو کاغذ کے بجائے **سوفٹ کاپی** کی صورت میں وزیراعلیٰ **علی امین گنڈاپور** کو آن لائن سسٹم کے ذریعے بھیجا گیا، جس پر انہوں نے **ڈیجیٹل دستخط** کر کے اس نئے نظام کا آغاز کیا۔
اس موقع پر وزیراعلیٰ نے کہا کہ اب سرکاری **مراسلے، اعلامیے اور احکامات** بھی مکمل طور پر ڈیجیٹل کیے جا رہے ہیں، جبکہ **اجلاسوں کے ورکنگ پیپرز** اور دیگر فائل ورک کو بھی ای سسٹم پر منتقل کیا جا رہا ہے۔
انہوں نے کہا کہ اس اقدام سے نہ صرف **وقت کی بچت** ہوگی بلکہ **وسائل کے ضیاع** کو بھی روکا جا سکے گا۔ علی امین گنڈاپور نے اس عزم کا اظہار کیا کہ خیبرپختونخوا کو **عمران خان کے وژن** کے مطابق مکمل طور پر **ڈیجیٹل صوبہ** بنایا جائے گا۔
