وفاقی حکومت نے توشہ خانہ کے نظام کو شفاف اور جدید بنانے کے لیے ایک اہم قدم اٹھاتے ہوئے اسے مکمل طور پر ڈیجیٹلائز کرنے کا فیصلہ کیا ہے۔
کابینہ ڈویژن کے مطابق اس مقصد کے تحت ایک خصوصی انوینٹری ایپلی کیشن تیار کی گئی ہے، جو تحائف کے ٹریک اینڈ ٹریس اور آڈٹ کو ممکن بنائے گی۔
یہ ایپلی کیشن محکمہ داخلہ پنجاب کے تعاون سے تیار کی گئی ہے، جو توشہ خانہ کے ریکارڈ کو ایک خودکار اور منظم نظام کے تحت چلائے گی۔
اس اقدام کا بنیادی مقصد سرکاری و حکومتی شخصیات کو بیرونِ ملک سے ملنے والے تحائف کے ریکارڈ کو شفاف، قابل رسائی اور منظم بنانا ہے۔
کابینہ کمیٹی نے توشہ خانہ سے متعلق قواعد و ضوابط پر مشتمل سفارشات کو بھی حتمی شکل دے دی ہے، جو جلد منظوری کے لیے وفاقی کابینہ کو پیش کی جائیں گی۔
کابینہ ڈویژن کے مطابق سال 2024 تک موصول ہونے والے تحائف کا ریکارڈ پہلے ہی سرکاری ویب سائٹ پر جاری کیا جا چکا ہے، جب کہ نیا خودکار نظام بہت جلد مکمل طور پر فعال کر دیا جائے گا۔
