قومی احتساب بیورو (نیب) نے ملک بھر میں پراپرٹی اور ہاؤسنگ سیکٹر میں فراڈ کی روک تھام اور شفاف لین دین کو یقینی بنانے کے لیے ایک جدید ترین آن لائن سسٹم تیار کر لیا ہے، جس کا افتتاح چیئرمین نیب جلد کریں گے۔
یہ الٹرا ماڈرن اور لیک پروف آن لائن نظام نیب اسلام آباد/راولپنڈی کے ڈائریکٹر جنرل اور ان کی ٹیم کی محنت سے تشکیل پایا ہے۔ اس نظام کے تحت پورے پاکستان کے تمام پلاٹس کا ریکارڈ ایک مرکزی ڈیجیٹل پورٹل پر دستیاب ہوگا۔ صارفین صرف چند کلکس میں کسی بھی پلاٹ یا ہاؤسنگ سوسائٹی کی قانونی حیثیت، این او سی، نقشہ، اور اصل مالکان کی تفصیلات حاصل کر سکیں گے۔
نیب کے مطابق اس سسٹم سے فراڈ، جعلسازی، اوور سیلنگ، جعلی فائلز اور غیر قانونی زمینوں کی خرید و فروخت جیسے جرائم کا مؤثر طور پر خاتمہ ممکن ہوگا۔ ہر شہری پلاٹ نمبر کے ذریعے آسانی سے تصدیق شدہ معلومات حاصل کر سکے گا، اور سسٹم سے جاری ہونے والی رپورٹ کو قانونی خرید و فروخت کے لیے بطور مستند دستاویز استعمال کیا جا سکے گا۔
یہ پلیٹ فارم نہ صرف عوام بلکہ قانون نافذ کرنے والے اداروں اور ریگولیٹری اتھارٹیز کے لیے بھی ایک طاقتور ٹول ثابت ہوگا، جو پراپرٹی کے شعبے میں شفافیت، اعتماد اور قانون کی عملداری کو فروغ دے گا۔ نیب کے ترجمان کے مطابق یہ نظام جلد عوام کے لیے فعال کر دیا جائے گا، جس سے ہر خریدار یا فروخت کنندہ تصدیق شدہ اور محفوظ لین دین کر سکے گا۔
