سینیٹ کی قائمہ کمیٹی خزانہ کے اجلاس میں ایف بی آر کے ممبر حامد عتیق سرور نے انکشاف کیا کہ بھارت کی جانب سے ایک ہی دن میں ایک ہزار چھ سو چوراسی سائبر حملے کیے گئے، تاہم تمام حملے ناکام رہے اور نہ ہی کوئی ڈیٹا لیک ہوا۔ انہوں نے یقین دہانی کرائی کہ ٹیکس دہندگان کا ڈیٹا مکمل محفوظ ہے اور انہیں ہراساں نہیں کیا جائے گا، ملوث افسران کیخلاف کارروائی کی جائے گی۔ اجلاس میں وزیر مملکت بلال اظہر کیانی نے بتایا کہ کاروباری برادری کے مسائل حل کیے جا رہے ہیں، تاہم آئی ایم ایف پروگرام کے باعث کچھ تفصیلات نہیں بتائی جا سکتیں۔ اجلاس میں فلائنگ انوائسنگ پر بھی غور کیا گیا اور انکشاف ہوا کہ گزشتہ مالی سال میں آٹھ سو ستاون ارب روپے جبکہ دو ہزار تئیس تا چوبیس میں ایک ہزار تین سو تیرہ ارب روپے کی جعلی انوائسنگ پکڑی گئی ہے۔
