اسلام آباد: وفاقی حکومت نے جڑواں شہروں اسلام آباد اور راولپنڈی میں بسوں اور ویگنوں کے اڈوں کی منتقلی کا فیصلہ کر لیا ہے، جس کے تحت ملک بھر سے آنے اور جانے والی تمام پبلک ٹرانسپورٹ کے لیے دو جدید ترین سٹیٹ آف دی آرٹ بس ٹرمینلز تعمیر کیے جائیں گے۔
تفصیلات کے مطابق پہلا بس ٹرمینل چونگی نمبر 26 جبکہ دوسرا ٹرمینل ٹی چوک روات کے قریب تعمیر کیا جائے گا۔ اس کے علاوہ، ٹی چوک روات پر انٹرچینج کی تعمیر بھی کی جائے گی، جبکہ ٹی چوک روات سے مندرہ/بانٹھ موڑ اور رنگ روڈ انٹرچینج تک جی ٹی روڈ کو 10 رویہ کرنے کا فیصلہ کیا گیا ہے۔
اس کے ساتھ ساتھ، چونگی نمبر 26 پر ملک کا سب سے بڑا ٹریفک انٹر جنکشن بھی تعمیر کیا جائے گا تاکہ جڑواں شہروں کی ٹریفک کی روانی کو بہتر بنایا جا سکے۔
راولپنڈی رنگ روڈ کی تکمیل کے بعد، آئی الیون اسلام آباد میں قائم سبزی منڈی کو ختم کر کے راولپنڈی رنگ روڈ پر منتقل کر دیا جائے گا تاکہ شہر کے وسط میں ٹریفک کے دباؤ کو کم کیا جا سکے اور سبزی منڈی کے لیے ایک جدید اور وسیع مقام فراہم کیا جا سکے۔
حکومت کا کہنا ہے کہ یہ اقدامات جڑواں شہروں میں ٹریفک کی بہتری، پبلک ٹرانسپورٹ کے انتظامات کو بہتر بنانے اور شہریوں کو سہولت فراہم کرنے کے لیے کیے جا رہے ہیں۔
