پی آئی اے کے کل اثاثہ جات کتنے اور قرضوں کا بوجھ کتنا ہے ۔۔۔؟ اس حوالے سے اہم تفصیلات سامنے آئی ہیں ۔
سینئر صحافی کی رپورٹ کے مطابق گزشتہ روز قومی ایئر لائن کی نیلامی کے حوالے سے 10 ارب روپے کی پیشکش کی گئی تھی اس رقم کو اگر گذشتہ برس دسمبر میں تیار ہونے والی پی آئی اے کی فنانشنل رپورٹ کے تناظر میں دیکھا جائے تو نہ صرف افسوسناک بلکہ مضحکہ خیز صورتحال بھی سامنے آتی ہے ، 7200ملازمین بھاری بوجھ ہیں ۔
مذکورہ رپورٹ کے مطابق پی آئی اے کے کل اثاثہ جات کی مالیت 56 کروڑ ڈالر (72 ارب 110 کروڑ 4 لاکھ روپے )ہے، جبکہ پی آئی اے پر قرضوں کا کل حجم تقریباً پونے تین ارب ڈالر (تقریباً 800 ارب روپے) ہے۔ اس میں پینشن فنڈز، پراویڈنڈ فنڈ اور ادھار فیول کی خطیر رقم شامل ہے۔
حکومت نے پی آئی اے کو فروخت کے لیے پیش کرنے پر ان قرضوں کو کم و بیش اپنے کھاتے میں ڈالتے ہوئے ان کو تقریباً 200 ارب روپے تک یعنی ایک چوتھائی کر دیا۔ یعنی جو کوئی بھی پی آئی اے خریدے گا اس کے حصے میں 200 ارب روپے ادا کرنے کی ذمہ داری بھی ہو گی۔
یوں وفاقی کابینہ سے منظور شدہ رقم 85 ارب روپے اور 200ارب روپے کے قرضے ملا کر پی آئی اے کے 60 فیصد حصص آپ کے نام ہو سکتے ہیں۔ اس کے ساتھ قومی ایئرلائن کے 7200 مستقل ملازمین بھی ایک بھاری بوجھ کی شکل میں آئیں گے۔
