اسلام آباد: پاک بحریہ کے جہاز پی این ایس ذوالفقار نے خلیج عدن میں ایرانی ماہی گیر کشتی المحمدی کو طبی اور تکنیکی امداد فراہم کرتے ہوئے 23 ماہی گیروں کو کامیابی سے ریسکیو کیا۔ یہ واقعہ اس وقت پیش آیا جب کشتی اپنی بندرگاہ سے 1200 ناٹیکل میل دور انجن کی خرابی کے باعث پھنس گئی تھی۔
پی این ایس ذوالفقار نے فوری طور پر کشتی کی ڈسٹریس کال کا جواب دیتے ہوئے اپنی طبی اور تکنیکی ٹیموں کو مدد کے لیے روانہ کیا۔ کشتی کے عملے نے بتایا کہ ایک رکن شدید زخمی ہے، جبکہ انجن کی خرابی کے باعث فوری امداد کی ضرورت ہے۔ بحری جہاز کی ٹیم نے زخمی ماہی گیر کو ابتدائی طبی امداد فراہم کی اور دو مزید بیمار ارکان کا بھی معائنہ کیا۔ علاوہ ازیں، ٹیم نے کشتی کے انجن کی مرمت بھی کی۔
پاک بحریہ کا یہ اقدام بحر ہند اور بحیرہ عرب میں سلامتی اور استحکام کے قومی مقصد کے تحت انجام دیا گیا۔ یہ انسانی ہمدردی کی بنیاد پر امدادی آپریشن بحری جہازوں کی حفاظت اور سلامتی کے لیے پاک بحریہ کے عزم کی عکاسی کرتا ہے۔
