اسلام آباد(سٹاف رپورٹر)امریکی ادارہ برائے بین الاقوامی ترقی (یو ایس اے آئی ڈی) نےاسلام آباد میں ایک اہم ورکشاپ کا اہتمام کیا جس کا مقصد ماحول میں پاکستان کی ڈیری انڈسٹری سے پیدا ہونے والی میتھین کے اخراج کو روکنا ہے۔یہ ورکشاپ پاکستان جیسے ترقی پذیر ممالک میں ماحولیاتی سرمایہ کاری کو فروغ دینے کے لیے یو ایس اے آئی ڈی کی کوششوں کا حصہ ہے۔ تقریب میں ڈیری کی صنعت میں میتھین کے اخراج کو کم کرنے کےحوالے سے حل تلاش کرنے کے لیے مختلف شعبوں کے سٹیک ہولڈرز کو اکٹھا کیا گیا۔ اس پروگرام کے ذریعے گرین کلائمیٹ فنڈ کے تحت جاری کردہ فنڈنگ کا حصول ممکن ہو سکے گا، جس سے پاکستان کو ماحولیاتی اہداف کو پورا کرنے میں مدد ملے گی۔
تقریب سے خطاب کرتے ہوئے امریکی سفیر ڈونلڈ بلوم نے کہا، "2030 تک میتھین کے اس اخراج کو تقریباً نصف تک کم کر کے، ہم درجہ حرارت میں اضافے کو 1.5 ڈگری سیلسیس سے کم رکھنے کے عالمی ہدف میں اہم کردار ادا کر سکتے ہیں جو پیرس معاہدے کا ایک اہم جزو ہے۔” سفیر بلوم کا مزید کہنا تھا کہ یہ ورکشاپ اس مسئلے سے نمٹنے اور پاکستان کے لیے پائیدار مستقبل کی جانب ایک اہم قدم ہے۔
میتھین کا شمار طاقتور گرین ہاؤس گیس میں ہوتا ہے جو گلوبل وارمنگ میں اضافے کا سبب بنتی ہے۔ موسمیاتی تبدیلی کے اثرات کو محدود کرنے کے لیے میتھین کے اخراج کو کم کرنا بہت ضروری ہے۔ ڈیری فارمنگ کی صنعت پاکستان میں میتھین کے اخراج کی بڑی وجہ ہے کیونکہ پاکستان میں بڑے پیمانے پر ڈیری فارمنگ کی جاتی ہے۔ اس صنعت کو ماحول دوست بنانے کے لیے نجی شعبے کی شمولیت بہت ضروری ہے۔ ورکشاپ میں موسمیاتی تبدیلیوں سے مؤثر طریقوں سے نمٹنے کے لیے مالی اور تکنیکی مدد کی ضرورت پر زور دیا گیا۔ یہ پروگرام نہ صرف پاکستان کے ڈیری سیکٹر کو فائدہ پہنچائے گا بلکہ ماحولیاتی تبدیلیوں سے نمٹنے کے حوالے سے عالمی کوششوں میں بھی اہم کردار ادا کرےگا۔
امریکہ اور پاکستان کے مابین ترقیاتی شراکت داری کی ایک طویل تاریخ ہے۔ یہ ورکشاپ پاک امریکہ گرین الائنس کے فریم ورک کا حصہ ہے، جس میں ماحولیاتی استحکام پر توجہ دی گئی۔
امریکہ اور یو ایس اے آئی ڈی کے اس اقدام کو سراہتے ہوئے فیڈرل سیکرٹری برائے قومی غذائی تحفظ و تحقیق ڈاکٹر فخر عالم عرفان نے کہا، "ہم امریکہ کے اس اقدام کا خیرمقدم کرتے ہیں، اس پروگرام کا مقصد ہمارے ملک کے ماحولیاتی استحکام اور موافقت کی کوششوں کو مزید بہتر بنانا ہے۔”
یو ایس اے آئی ڈی کی ترجیحات کے ساتھ ہم آہنگ، اس اقدام کا مقصد پاکستان میں میتھین کے کم اخراج والی ڈیری کی پیداواری صلاحیت میں اضافے کے لیے سرکاری اور نجی شعبوں کی سرمایہ کاری میں بہتری لانا ہے۔
