سکھر( نمائندہ خصوصی)سکھر ڈیویلپمنٹ الائنس کے چیئرمین حاجی محمد جاوید میمن نے کہا ہے کہ شہر بھر میں مضرصحت ، کیمیکل ملا دودھ کی کھلے عام فروخت جاری ہے،غیر معیاری کوکنگ آئل، ملاوٹ شدہ لال مرچوں کے استعمال سے شہری تیزی سے مختلف امراض میں مبتلا ہو رہے ہیں، جسے کوئی بھی ادارہ چیک کرنے کو تیار نہیں، محکمہ فوڈ اور چھاپہ مار ٹیمیں غیر فعال ہونے کی وجہ سے ملاوٹ کا کاروبار عروج پر پہنچ گیا ہے، حکومت اور انتظامیہ فوری طور پر اس کا نوٹس لیکر اشیاءخور و نوش، کوکنگ آئل، مرچ، مصالحہ جات، دودھ، دھی کی کوالٹی کی باقاعدہ چیکنگ اور ملاوٹ سے پاک اشیاءکی فروخت کو یقینی بنائیں تاکہ مزید افراد کو مختلف امراض سے بچایا جاسکے۔
ان خیالات کا اظہار انہوں نے اپنے دفتر میں سکھر ڈیویلپمنٹ الائنس کے رہنماﺅں سے بات چیت کے دوران کیا۔ حاجی محمد جاوید میمن و دیگر رہنماﺅں کا مزید کہنا تھا کہ انتہائی افسوس کا مقا م ہے کہ حکومت کی جانب سے عوام کو سہولیات فراہم کرنے کیلئے ادارے تو قائم کیے گئے ہیں اور نہیں بھاری تنخواہیں اور مراعات بھی دی جا رہی ہے لیکن بدقسمتی سے کوئی بھی ادارہ اپنا کام کرنے کو تیار نہیں، جس سے ملاوٹ کا کاروبار کرنے والے افراد کے حوصلے بلند ہو رہے ہیں اور وہ دھرلے سے دونمبر اور مضر صحت آٹا، کوکنگ آئل، مصالح جات، مرچ، گوشت ، کیمکل ملا دودھ اور دیگر ایشاءفروخت کر رہے ہیں، جس شہریوں کی ایک بڑی تعداد تیزی سے مختلف امراض میں مبتلا ہو رہی ہے، اس کے باوجود کوئی بھی ادارہ ان کے خلاف کارروائی کرنے کو تیار نہیں۔
انہوں نے حکومت اور انتظامیہ سے مطالبہ کیا کہ وہ فوری طور پر شہر میں ملاوٹ شدہ اشیاءکی روک تھام کیلئے روزانہ کی بنیاد پر چیکنگ اور چھاپہ مار کارروائیوں کا آغاز کر کے معیاری اشیاءکی فروخت یقینی بنائیں تاکہ شہریوں کو مختلف امراض سے محفوظ رکھا جاسکے ۔
