اسلام آباد(نیوزڈیسک)اسلام آباد ہائی کورٹ نے وی لاگر کا نام ای سی ایل سے نہ نکالنے پر سیکریٹری داخلہ کے وارنٹ جاری کر دیے۔
اسلام آباد ہائی کورٹ کی جانب سے سیکریٹری داخلہ کے قابلِ ضمانت وارنٹِ گرفتاری جاری کیے گئے ہیں۔
وی لاگر کا نام ای سی ایل سے نکالنے کی درخواست پر عدالت نے سیکریٹری داخلہ سے رپورٹ طلب کی تھی۔
عدالتی احکامات کے باوجود وی لاگر کا نام ای سی ایل سے نہ نکالنے پر اسلام آباد ہائی کورٹ نے برہمی کا اظہار کیا تھا۔
عدالتِ عالیہ نے سیکریٹری داخلہ سے آج 1 گھنٹے میں رپورٹ طلب کی تھی۔
جسٹس سردار اعجاز اسحاق نے کہا کہ سیکریٹری داخلہ وجوہات بتائیں کہ وی لاگر کا نام ای سی ایل سے کیوں نہیں نکالا؟ اگر تسلی بخش جواب نہ ملا تو آج ہی توہینِ عدالت کی کارروائی ہو گی۔
اسلام آباد ہائی کورٹ کے جسٹس سردار اعجاز اسحاق خان نے عدالتی حکم کے باوجود 1 گھنٹے میں پیش نہ ہونے پر وارنٹ جاری کیے۔
سرکاری وکیل نے انہیں بتایا کہ ڈی جی پاسپورٹ راستے میں ہیں، کچھ دیر میں پہنچ جائیں گے۔
جسٹس سردار اعجاز اسحاق خان نے کہا کہ وہ آ کر کیا کہیں گے؟ انہیں وزارتِ داخلہ نے کہا تھا، 50 ہزار روپے کے مچلکوں پر قابلِ ضمانت وارنٹ جاری کر رہے ہیں، متعلقہ ایس ایچ او دن ڈھائی بجے سیکریٹری داخلہ کو پیش کرے۔
