اسلام آباد: سینیٹر اور سابق وفاقی وزیر فیصل واوڈا نے کہا ہے کہ ریاست پاکستان بیرون اور اندرون ملک دشمنوں کو خود جواب دے گی۔
انہوں نے واضح کیا کہ جو لوگ ملک کے خلاف بیانیہ پھیلا رہے ہیں، وہ غداری کے زمرے میں آتے ہیں اور ان کے خلاف سخت کارروائی کی جائے گی۔
ایک ذہنی مریض قومی سلامتی کیلئے خطرہ بن چکا، بھرپور نمٹا جائے گا: ڈی جی آئی ایس پی آر
فیصل واوڈا نے مزید کہا کہ پی ٹی آئی کے منصوبے بھارت اور افغانستان سے ملی ہوئی سازشوں کے تحت چلائے جا رہے ہیں، جس کا مقصد پاکستان میں عدم استحکام پیدا کرنا ہے۔
انہوں نے کہا کہ ریاست نے دہشت گردوں اور ملک کو نقصان پہنچانے والے عناصر کو پہلے ہی غدار قرار دے دیا ہے اور اب پاکستان اور قومی اداروں کے خلاف کوئی بھی غلط بیانیہ برداشت نہیں کیا جائے گا۔
سینیٹر نے خبردار کیا کہ جو بھی ملک دشمن سرگرمیوں میں ملوث ہوگا، اسے قانون کے مطابق جوابدہ بنایا جائے گا۔ انہوں نے کہا کہ عوام اور قومی ادارے متحد رہیں تاکہ دشمنوں کے منصوبے ناکام ہوں اور پاکستان میں امن و استحکام قائم رہے۔
فیصل واوڈا کے مطابق یہ اقدامات ملک کی سالمیت اور قومی سلامتی کو یقینی بنانے کے لیے ضروری ہیں اور کسی بھی طرح کے ملکی دشمن بیانیے کو برداشت نہیں کیا جائے گا۔
