اسلام آباد:
ملکی معاشی صورتِ حال کے حوالے سے وزارتِ خزانہ نے آؤٹ لک رپورٹ جاری کردی ہے۔
رپورٹ کے مطابق رواں ماہ (نومبر) میں مہنگائی کی شرح پانچ سے چھ فیصد کے درمیان رہنے کا امکان ہے جبکہ پاکستان کی معاشی صورتحال محتاط طور پر مثبت دکھائی دے رہی ہے۔ خوراک کی قیمتوں اور زرعی پیداوار پر دباؤ موجود ہے تاہم صنعتی سرگرمیوں میں بتدریج بہتری جاری ہے۔
عظمیٰ بخاری جس طرح اقتدار میں آئیں بلاول ایسے نہیں آئیں گے: شرجیل میمن
ماہانہ معاشی آؤٹ لک رپورٹ میں مزید بتایا گیا ہے کہ معاشی اصلاحات کے نفاذ سے اقتصادی سرگرمیوں میں استحکام پیدا ہوا ہے۔ فصلوں کا مجموعی منظرنامہ ملا جلا رجحان دکھا رہا ہے اور مناسب زرعی ان پٹس کی دستیابی سے صورتحال مزید بہتر ہونے کی توقع ہے۔
رپورٹ کے مطابق حکومتی معاون اقدامات سے سپلائی میں بہتری کا امکان ہے اور ربیع سیزن کے دوران زرعی سپلائی کے استحکام کی امید ہے۔ وزارت خزانہ کے مطابق معیشت بتدریج استحکام کی جانب بڑھ رہی ہے اور ساختی اصلاحات کے عملی نتائج سامنے آنا شروع ہوگئے ہیں جبکہ مالی نظم و ضبط میں بہتری اور محصولات میں اضافہ دیکھنے میں آیا ہے۔
آؤٹ لک رپورٹ میں کہا گیا ہے کہ حکومتی اخراجات میں محتاط حکمت عملی برقرار رہے گی۔ ترسیلاتِ زر میں اضافہ ہو رہا ہے اور معاشی صورتحال مزید مستحکم دکھائی دے رہی ہے۔
وزارتِ خزانہ کے مطابق ایل ایس ایم سیکٹر اور آئی ٹی برآمدات میں اضافہ ہوا ہے جبکہ عوامی قرضہ 1371 ارب روپے کم ہوگیا ہے۔ رپورٹ میں یہ بھی بتایا گیا ہے کہ پانچ سال بعد پہلی بار ایک سہ ماہی میں قرض میں نمایاں کمی ریکارڈ کی گئی ہے اور مہنگے قرضوں کی قبل از وقت ادائیگی سے مالی خطرات میں کمی کا امکان ہے۔ حکومت کی اقتصادی استحکام کی حکمت عملی مؤثر ثابت ہو رہی ہے۔
