چیئرمین پاکستان پیپلز پارٹی بلاول بھٹو زرداری نے نیویارک کے نومنتخب میئر ظہران ممدانی کو تاریخی کامیابی پر مبارکباد دیتے ہوئے کہا ہے کہ "روٹی، کپڑا اور مکان” کا نعرہ اب کراچی سے نیویارک تک انسانیت کا منشور بن چکا ہے۔
سیاست، جمہوریت اور سیاسی جماعتیں
سوشل میڈیا پر اپنے بیان میں بلاول بھٹو نے کہا کہ ظہران ممدانی کی جیت اس بات کا ثبوت ہے کہ "روٹی، کپڑا اور مکان” صرف ایک نعرہ نہیں بلکہ دنیا بھر کے عوام کا بنیادی حق ہے۔ انہوں نے کہا کہ اس نظریے نے سرحدوں کو عبور کر کے عالمی سطح پر عوامی امنگوں کی ترجمانی کی ہے۔
میئر کراچی مرتضیٰ وہاب نے بھی ظہران ممدانی کو مبارکباد پیش کی اور کہا کہ ان کی کامیابی عالمی شہروں کے درمیان تعاون کے ایک نئے دور کا آغاز کرے گی۔
واضح رہے کہ ظہران ممدانی امریکا کے اہم ترین شہر نیویارک کے پہلے مسلمان اور سب سے کم عمر میئر بن گئے ہیں۔ 34 سالہ ظہران ممدانی نے غیر سرکاری نتائج کے مطابق 49.6 فیصد ووٹ حاصل کیے، جبکہ ان کے حریف سابق گورنر اینڈریو کومو کو 41.6 فیصد ووٹ ملے۔
ظہران ممدانی نے اپنی انتخابی مہم میں کرایوں کو منجمد کرنے، مفت پبلک بس سروس شروع کرنے اور شہر کے زیرِ انتظام گروسری اسٹورز قائم کرنے جیسے ترقی پسند وعدے کیے تھے، جنہوں نے انہیں عوام میں بے حد مقبول بنایا۔
