پاکستانی اوپنر صائم ایوب نے ٹی ٹوئنٹی انٹرنیشنل میں سب سے زیادہ مرتبہ صفر پر آؤٹ ہونے کا ناپسندیدہ ریکارڈ برابر کر دیا ہے۔
خواجہ آصف نے طورخم بارڈر کھولنے کی اصل وجہ بتا دی
صائم ایوب اس سے قبل عمر اکمل کے قائم کردہ ریکارڈ کے قریب تھے، جو 84 میچوں میں 10 مرتبہ بغیر کوئی رن بنائے آؤٹ ہوئے تھے۔ اب صائم ایوب نے اپنے صرف 51ویں میچ میں دسویں بار صفر پر آؤٹ ہو کر ان کا یہ ریکارڈ برابر کر دیا ہے۔
اعدادوشمار کے مطابق سابق کپتان شاہد آفریدی اور بابر اعظم آٹھ آٹھ بار صفر پر آؤٹ ہو چکے ہیں، جب کہ کامران اکمل، محمد نواز اور محمد حفیظ سات سات بار بغیر کوئی رن بنائے پویلین لوٹے۔
دوسری جانب جنوبی افریقہ کے وکٹ کیپر بیٹر کوئنٹن ڈی کوک نے بھی اپنی ٹیم کے لیے یہی ناپسندیدہ اعزاز حاصل کیا۔ قذافی اسٹیڈیم لاہور میں پاکستان کے خلاف تیسرے ٹی ٹوئنٹی کے دوران شاہین شاہ آفریدی کی گیند پر وہ صفر پر آؤٹ ہوئے، جو ان کے کیریئر کا آٹھواں "ڈک” تھا۔
ڈی کوک نے 96 ٹی ٹوئنٹی میچوں میں آٹھ مرتبہ صفر پر آؤٹ ہو کر جنوبی افریقہ کی جانب سے سب سے زیادہ بار بغیر رن بنائے آؤٹ ہونے والے کھلاڑی کا ریکارڈ اپنے نام کیا۔ ان کے بعد اینڈائل فیلوک وائیو سات، جبکہ ٹمبا باووما، جے پی ڈومنی اور ریزا ہینڈرکس چھ چھ بار صفر پر آؤٹ ہوئے ہیں۔
