ہیلتھ ایشیا 2025 پاکستان کی سب سے بڑی بین الاقوامی صحت اور طبی نمائشوں اور کانفرنسز میں سے ایک ہے، جو ماہرینِ صحت، طبی اداروں اور تنظیموں کے لیے علم و تجربے کے تبادلے کا مؤثر پلیٹ فارم فراہم کرتی ہے۔ اسی سلسلے میں پٹیل ہسپتال نے بچوں کے امراض اور بچوں کی سرجری کے موضوع پر ایکسیشن کا انعقاد کیا۔
اس سیشن میں طبی طلباء، ٹرینی ڈاکٹرز، ریزیڈنٹس اور مختلف شعبۂ صحت سے تعلق رکھنے والے ماہرین نے شرکت کی۔ مہمانوں میں ڈپٹی میڈیکل ڈائریکٹر ڈاکٹر شاہ مثابت سلیم، ڈائریکٹر کمیونیکیشن اینڈ ریسورس ڈویلپمنٹ (CRD) جناب فرحان اسدی اور ڈائریکٹر آپریشنز جناب محمد صدیق شامل تھے۔ تقریب کی میزبانی ڈاکٹر مریم ظفر نے کی۔
تقریب کا آغاز ڈاکٹر شاہ مثابت سلیم کی افتتاحی گفتگو سے ہوا، جنہوں نے پٹیل اسپتال کا تعارف کراتے ہوئے اس کی وسیع طبی خدمات، انسانی ہمدردی کے جذبے اور بہترین علاج معالجے کے عزم کو اجاگر کیا۔ انہوں نے ہسپتال کے فلاحی اقدامات پر بھی روشنی ڈالی، جن کے ذریعے مستحق مریضوں کو معیاری طبی سہولیات فراہم کی جاتی ہیں۔
اس کے بعد پٹیل ہسپتال کے ممتاز ماہرین نے شرکاء کو مختلف موضوعات پر دلچسپ معلومات فراہم کیں ۔ ڈاکٹر تیمور، کنسلٹنٹ پیڈیاٹرک سرجن، نے بچوں کی سرجری کی اہمیت، دائرہ کار، پیچیدگیوں اور بروقت علاج کی ضرورت پر تفصیل سے روشنی ڈالی۔ ڈاکٹر جلال اکبر، سینئر کنسلٹنٹ پیڈیاٹریشن، نے “بچوں میں ویکسینیشن کی اہمیت” کے عنوان سے گفتگو کرتے ہوئے بتایا کہ ویکسین کیسے کام کرتی ہیں، بیماریوں سے بچاؤ میں ان کا کیا کردار ہوتا ہے، اور ویکسینیشن کے فروغ میں طبی عملے کو کن سماجی چیلنجز کا سامنا کرنا پڑتا ہے۔
ڈاکٹر عظمینہ خان، کنسلٹنٹ پیڈیاٹریشن، نے بچپن میں متوازن غذا کی اہمیت پر گفتگو کی اور مختلف عمر کے مراحل میں بچوں کے لیے مناسب خوراک اور ماں کے دودھ کی افادیت پر زور دیا۔ انہوں نے نوجوانوں میں بڑھتی ہوئی سگریٹ نوشی کو ایک تشویشناک مسئلہ قرار دیتے ہوئے اس پر فوری توجہ دینے کی ضرورت پر بھی زور دیا۔ آخر میں ڈاکٹر نورین اقبال، سینئر ریجسٹرار، نے بچوں میں دمہ کے نظم و نسق (Asthma Management) پر تفصیلی گفتگو کی، جس میں انہوں نے اس بیماری کے چیلنجز اور مؤثر علاج کی تکنیکوں و آلات کے بارے میں معلومات فراہم کیں جو بچوں کے لیے مددگار ثابت ہوتی ہیں۔
سیشن کے اختتام پر سپیکرز اور میزبان میں شیلڈ تقسیم کی گئیں۔پٹیل ہسپتال تعلیمِ طب، پیشہ ورانہ ترقی اور عوامی صحت سے متعلق آگاہی کے فروغ میں اپنے کردار کو برقرار رکھتے ہوئے معاشرے کو معیاری اور ہمدردانہ طبی سہولیات فراہم کرنے کے عزم کی تجدید کرتا ہے۔
