غیر ملکی سم کی خریداری اور فروخت میں ملوث افراد خبردار ہو جائیں کیونکہ انہیں سخت سزاؤں کا سامنا کرنا پڑ سکتا ہے۔
پاکستان ٹیلی کمیونیکیشن اتھارٹی (پی ٹی اے) شہریوں کی ذاتی معلومات کو محفوظ کرنے کیلیے اقدامات کرتا ہے اور اکثر اس حوالے سے انتباہات بھی جاری کرتا ہے۔
پی ٹی اے نے حال ہی میں ایسے افراد کو خبردار کیا ہے جو غیر ملکی سم کی خرید اور فروخت میں ملوث ہیں۔
اتھارٹی نے کہا کہ غیر ملکی سم خریدنا اور بیچنا پاکستان میں غیر قانونی اور قابل سزا قانون ہے، غیر قانونی سرگرمیوں میں ملوث ہونے سے بچیں جو قانونی کارروائی اور سخت سزاؤں کا باعث بن سکتی ہیں۔
چند روز قبل پی ٹی اے نے کہا تھا کہ جرائم پیشہ عناصر آپ کی چوری شدہ معلومات کا استعمال کرتے ہوئے آپ کے نام پر غیر قانونی سم حاصل کر سکتے ہیں جو فراڈ، غیر قانونی سرگرمیوں اور دہشتگردی کیلیے استعمال ہو سکتی ہے۔
پی ٹی اے نے نام پر رجسٹرڈ موبائل سم کی معلومات فوری پر حاصل کرنے کا آسان طریقہ بتایا تھا۔ نام پر رجسٹرڈ سموں کی تعداد معلوم کرنے کیلیے cnic.sims.pk وزٹ کریں۔
اگر آپ کے پاس انٹرنیٹ کی سہولت موجود نہیں تو 668 پر اپنا قومی شناختی کارڈ نمبر ایس ایم ایس کریں اور معلومات حاصل کریں، نام پر رجسٹرڈ کوئی بھی ایسی موبائل سم جو آپ کے زیر استعمال نہیں اسے فوری بلاک کروائیں۔
اتھارٹی نے شہریوں کو ہدایت کی تھی کہ نئی موبائل سم ہمیشہ سیلولر کمپنیوں کے مجاز سیلز آؤٹ لیٹس، کسٹمر سروسز سینٹرز اور فرنچائز سے تمام قانونی تقاضے پورے کرنے کے بعد خریدیں۔
