اسلام آباد کی ڈسٹرکٹ اینڈ سیشن عدالت نے پاکستان تحریک انصاف کے بانی عمران خان اور ان کی اہلیہ بشریٰ بی بی کی عبوری ضمانت کی درخواستوں میں توسیع کر دی ہے۔
ایڈیشنل ڈسٹرکٹ اینڈ سیشن جج افضل مجوکا نے عمران خان کی 6 اور بشریٰ بی بی کی 1 ضمانت قبل از گرفتاری کی درخواستوں پر سماعت کی۔ تاہم، آج بھی عمران خان کی ضمانت سے متعلق درخواستوں پر دلائل پیش نہیں کیے جا سکے جبکہ بشریٰ بی بی کی درخواست پر محفوظ شدہ فیصلہ بھی سنایا نہیں جا سکا۔
عدالت کو بتایا گیا کہ عمران خان کی عدم حاضری کے باعث سماعت میں کوئی خاص پیش رفت ممکن نہیں ہو سکی۔ یاد رہے کہ گزشتہ سماعت میں عدالت نے عمران خان کو ذاتی حیثیت میں یا ویڈیو لنک کے ذریعے پیش کرنے کا حکم دیا تھا۔
آج کی کارروائی کے دوران عمران خان کی جانب سے ایڈووکیٹ خالد یوسف چوہدری عدالت میں پیش ہوئے۔ بعد ازاں، عدالت نے تمام درخواستوں پر سماعت 9 ستمبر تک ملتوی کر دی۔
واضح رہے کہ عمران خان پر احتجاج، توڑ پھوڑ اور اقدام قتل جیسی دفعات کے تحت پانچ مقدمات درج ہیں، جبکہ عمران خان اور بشریٰ بی بی کے خلاف توشہ خانہ کیس میں جعلی رسیدیں جمع کروانے کا بھی ایک کیس زیر سماعت ہے۔
