وکٹران اب پاکستان میں! Your Partner for Reliable Power 🔋 in Pakistan. 🇵🇰 The Best Energy Saving Solution ⚡
پٹایا (تھائی لینڈ) — پاکستان نے ایشین انڈور روئنگ چیمپئن شپ 2025 میں شاندار کارکردگی کا مظاہرہ کرتے ہوئے تاریخ رقم کر دی۔ قومی روئنگ ٹیم نے 10 طلائی، 3 چاندی اور 1 کانسی کا تمغہ جیت کر مجموعی طور پر 14 میڈلز اپنے نام کر لیے، جو اس ایونٹ میں پاکستان کی اب تک کی سب سے بڑی کامیابی ہے۔
25 ایشیائی ممالک کی شرکت کے ساتھ تھائی لینڈ کے شہر پٹایا میں منعقدہ اس چیمپئن شپ میں پاکستانی کھلاڑیوں کی محدود تعداد ہونے کے باوجود ٹیم نے بھارت، ایران، جاپان، جنوبی کوریا اور میزبان تھائی لینڈ سمیت کئی روایتی حریفوں کو پیچھے چھوڑ دیا۔ فتح کے لمحات میں ایوارڈز کی تقسیم کے دوران پاکستان کا قومی ترانہ گونجا اور سبز ہلالی پرچم فخر سے بلند ہوا۔
پاکستان روئنگ فیڈریشن کے صدر حمدان نذیر اور چیئرمین رضوان الحق نے کھلاڑیوں کی کارکردگی کو سراہتے ہوئے کہا کہ یہ نوجوان اب عالمی سطح پر بھی تمغے جیتنے کی مکمل صلاحیت رکھتے ہیں۔ انہوں نے وفاقی اور پنجاب حکومت سے مطالبہ کیا کہ ان قومی ہیروز کے اعزاز میں خصوصی تقریبات کا انعقاد کیا جائے اور ان کی حوصلہ افزائی کے لیے نقد انعامات دیے جائیں۔
پاکستان واپسی پر کھلاڑیوں کا فقیدالمثال استقبال کیا گیا۔ کھیلوں سے وابستہ شخصیات، شائقین، اور روئنگ فیڈریشن کے عہدیداروں نے ایئرپورٹ پر ان کا پرتپاک استقبال کیا۔
پاکستان روئنگ ٹیم کی یہ فتح نہ صرف کھیلوں کے میدان میں ایک روشن مثال ہے بلکہ اس سے ملک میں روئنگ کے فروغ کی نئی راہیں بھی کھلیں گی۔
