اسلام آباد: حکومتی ترجمان نے پاکستان تحریک انصاف (پی ٹی آئی) کے احتجاج اور اس کے بعد پیدا ہونے والے حالات پر سخت ردِعمل دیتے ہوئے الزامات کو مسترد کر دیا۔ ترجمان نے کہا کہ سکیورٹی فورسز پر فائرنگ کے الزامات جھوٹے ہیں اور اس حوالے سے کوئی شواہد پیش نہیں کیے گئے۔
انہوں نے وضاحت کی کہ احتجاج کے دوران کنٹینر پر موجود ایک شخص کے بارے میں پروپیگنڈا کیا گیا کہ وہ نماز ادا کر رہا تھا اور اسے دھکا دے کر گرایا گیا، جبکہ حقیقت یہ ہے کہ یہ شخص منڈی بہاؤالدین کا رہائشی ہے اور بالکل محفوظ ہے۔ ترجمان کے مطابق، یہ شخص نماز نہیں بلکہ ٹک ٹاک ویڈیو بنا رہا تھا اور اپنے دوست کو چیلنج دے رہا تھا۔
ترجمان نے مزید کہا کہ احتجاج کے دوران 45 جدید اسلحہ سے لیس افراد اور بعض افغان شہریوں کو بھی گرفتار کیا گیا، جنہیں قانون کے مطابق سزائیں دی جائیں گی۔ انہوں نے دعویٰ کیا کہ پی ٹی آئی کی جانب سے اموات اور سیکیورٹی اہلکاروں کی فائرنگ کے حوالے سے فیک نیوز کا سہارا لیا جا رہا ہے، مگر ان کے پاس اس کے کوئی ثبوت موجود نہیں ہیں۔
انہوں نے کہا کہ سکیورٹی فورسز کو کسی بھی احتجاج میں لائیو ایمونیشن استعمال کرنے کی اجازت نہیں ہوتی، جبکہ سی سی ٹی وی فوٹیج اور شواہد سے ظاہر ہوتا ہے کہ مظاہرین خود فائرنگ اور ٹیئر گیس شیلنگ کرتے ہوئے دیکھے گئے ہیں۔
ترجمان نے دعویٰ کیا کہ پورے بلیو ایریا میں کوئی خون کا نشان تک نظر نہیں آیا اور مظاہرین کی بھاگتے ہوئے ویڈیوز پوری قوم نے دیکھیں۔ انہوں نے کہا کہ احتجاج کے دوران پی ٹی آئی قیادت بھی غائب تھی، جن میں شیخ وقاص اکرم، عاطف خان، شہرام ترکئی اور اسد قیصر شامل ہیں، جو دھرنے میں شریک نہیں ہوئے۔
انہوں نے کہا کہ پی ٹی آئی جھوٹا پروپیگنڈا کر کے اپنی ناکامی چھپانے کی کوشش کر رہی ہے، لیکن عوام ان کے جھوٹ کو سمجھ چکی ہے۔ ترجمان نے اس بات پر زور دیا کہ حکومت قانون کے مطابق کارروائی کرے گی اور کسی کو ریاست کی رٹ چیلنج کرنے کی اجازت نہیں دی جائے گی۔
