یورپی یونین نے امریکا کے ساتھ تجارتی معاہدہ معطل کرنے پر غور شروع کر دیا ہے۔
عالمی میڈیا کی رپورٹ میں بتایا گیا ہے کہ گرین لینڈ کے معاملے نے امریکا اور اس کے یورپی اتحادیوں کے درمیان تجارتی تنازع کھڑا کر دیا ہے۔ یورپ نے امریکی صدر ڈونلڈ ٹرمپ کی جانب سے متعدد یورپی ممالک پر ٹیرف لگانے پر جوابی اقدامات کی تنبیہ کی ہے۔
سندھ حکومت کا سانحہ گل پلازہ میں جاں بحق افراد کے لواحقین کو 1 کروڑ روپے دینے کا اعلان
میڈیا رپورٹ کے مطابق امریکی صدر ڈونلڈ ٹرمپ نے کہا تھا کہ امریکا متعدد یورپی ممالک پر کسٹم ڈیوٹی عائد کرے گا۔ انہوں نے اس بات پر زور دیا کہ یہ اقدامات گرین لینڈ کی خریداری کا معاہدہ طے پانے تک جاری رہیں گے۔ انہوں نے اس خریداری کی وجہ امریکی اور عالمی سلامتی کو درپیش خطرات بتائے۔
واضح رہے کہ امریکی صدر نے ٹروتھ سوشل پر ایک پوسٹ میں کہا تھا کہ واشنگٹن نے ڈنمارک، پورے یورپی یونین اور دیگر ممالک کی کئی سالوں تک ڈیوٹی یا معاوضے کی کسی بھی شکل کے بغیر حمایت کی ہے اور اب وقت آگیا ہے کہ وہ اس کا بدلہ چکائیں کیونکہ عالمی امن داؤ پر ہے۔
ڈونلڈ ٹرمپ نے اعلان کیا تھا کہ یکم فروری 2026 سے مذکورہ ممالک سے امریکا آنے والی تمام اشیاء پر 10 فیصد کسٹم ڈیوٹی لگائی جائے گی، جسے یکم جون 2026 سے بڑھا کر 25 فیصد کر دیا جائے گا۔
انہوں نے زور دیا کہ یہ ڈیوٹی اس وقت تک نافذ رہے گی جب تک گرین لینڈ کی مکمل خریداری کا معاہدہ نہیں ہو جاتا۔ انہوں نے کہا کہ امریکا 150 سال سے زائد عرصے سے گرین لینڈ حاصل کرنے کی کوشش کر رہا ہے اور جدید دفاعی نظام "گولڈن ڈوم” کی وجہ سے اس کی ضرورت انتہائی ناگزیر ہو چکی ہے۔
