امریکا میں موجود دو ہزار افغان شہریوں کے دہشت گرد تنظیموں سے روابط کا انکشاف ہوا ہے۔
ڈائریکٹر امریکی نیشنل انٹیلی جنس تلسی گبارڈ نے امریکی میڈیا کو دیے گئے انٹرویو میں بائیڈن انتظامیہ کے دور میں امریکا آنے والے افغان شہریوں کی جانچ پڑتال کے سست عمل پر سخت تنقید کی۔ انہوں نے بتایا کہ آپریشن الائیز ویلکم کے تحت اٹھارہ ہزار افغان شہری امریکا میں داخل ہوئے تھے۔
لاہور میں پابندیوں کی نئی لہر، پیدل سڑک عبور کرنے پر مقدمہ درج
تلسی گبارڈ کا کہنا تھا کہ بائیڈن انتظامیہ کے دوران امریکا آنے والے افغان شہریوں کی مناسب جانچ نہیں کی گئی، تاہم اب آپریشن الائیز ویلکم کے تحت آنے والے ہر افغان شہری کا باریک بینی سے جائزہ لیا جا رہا ہے اور اس سلسلے میں تمام متعلقہ ادارے متحرک ہیں۔
انہوں نے انکشاف کیا کہ امریکا آنے والے اٹھارہ ہزار افغان شہریوں میں سے دو ہزار کے دہشت گرد تنظیموں سے براہ راست یا ممکنہ روابط سامنے آئے ہیں۔
ان کا کہنا تھا کہ داعش اور دیگر دہشت گرد تنظیمیں مسلسل امریکی سرزمین پر حملوں کی منصوبہ بندی میں مصروف ہیں اور یہ تنظیمیں امریکا میں ایسے افراد کی تلاش میں رہتی ہیں جو ان مقاصد کو پورا کر سکیں، اسی لیے اس خطرے کو انتہائی سنجیدگی سے لیا جا رہا ہے۔
تلسی گبارڈ نے انٹرویو کے دوران یہ بھی کہا کہ گزشتہ چند برسوں میں غیر قانونی طور پر امریکا آنے والوں کی تعداد میں بھی نمایاں اضافہ ہوا ہے۔
