اقوام متحدہ نے افغانستان میں انسانی بحران کی شدت اور خواتین کے حقوق کی پامالی پر تشویش ظاہر کی ہے۔
افغانستان کے لیے اقوام متحدہ کی نائب خصوصی نمائندہ جارجٹ گیگنن نے سلامتی کونسل کو بتایا کہ مجموعی سکیورٹی صورتحال بظاہر پرسکون ہونے کے باوجود پاکستان کے ساتھ سرحدی کشیدگی اور ملک میں جاری عسکری سرگرمیوں کے باعث حملے ہوئے ہیں۔
چکن اور انڈوں کی قیمت میں ہوشربا اضافہ
انہوں نے کہا کہ افغانستان کے عبوری حکام بین الاقوامی برادری کے ساتھ روابط کے مواقع مسلسل نظر انداز یا مسترد کر رہے ہیں۔ افغانستان میں خواتین اور لڑکیوں کو تعلیم تک رسائی حاصل نہیں، جس سے ملک کے مستقبل کے ڈاکٹرز، اساتذہ اور رہنماؤں کی کمی پیدا ہو رہی ہے۔
گیگنن نے مزید بتایا کہ میڈیا کی آزادی شدید محدود ہو گئی ہے اور نجی زندگی میں بھی حکومتی قوانین کے تحت مسلسل مداخلت ہو رہی ہے۔ انہوں نے خبردار کیا کہ خواتین کی شرکت کے بغیر مؤثر انسانی امداد ممکن نہیں ہے۔
ان کا کہنا تھا کہ انسانی حقوق اختیاری نہیں بلکہ روزمرہ زندگی کی بنیادی ضروریات ہیں اور افغانستان میں خواتین اور لڑکیوں کو تعلیم، کام اور مکمل شراکت کے مواقع فراہم کرنا بحالی کے لیے ناگزیر ہے۔
