ابوظبی: متحدہ عرب امارات نے جمعہ 31 اکتوبر کو نومبر 2025 کے لیے پیٹرول کی نئی قیمتوں میں نمایاں کمی کا اعلان کیا ہے۔
اکتوبر کے مقابلے میں نومبر میں فی لیٹر پیٹرول کی قیمتوں میں اوسطاً 10 سے 11 روپے تک کمی ریکارڈ کی گئی ہے، جو عالمی منڈی میں خام تیل کی قیمتوں میں حالیہ کمی کے باعث ممکن ہوئی ہے۔
اسکول وین ڈرائیور کے قتل میں ملوث ملزم گرفتار
اعلان کے مطابق سپر پیٹرول کی قیمت اکتوبر میں 2.77 درہم فی لیٹر (تقریباً 212 روپے) تھی، جو نومبر میں کم ہو کر 2.63 درہم فی لیٹر (تقریباً 201 روپے) کر دی گئی ہے، یعنی 11 روپے کی کمی ہوئی ہے۔
اسی طرح اسپیشل پیٹرول کی قیمت 2.66 درہم فی لیٹر (تقریباً 203 روپے) سے کم ہو کر 2.51 درہم فی لیٹر (تقریباً 192 روپے) کر دی گئی ہے، جبکہ ای پلس پیٹرول جو اکتوبر میں 2.58 درہم فی لیٹر (197 روپے) تھا، نومبر میں کم ہو کر 2.44 درہم فی لیٹر (تقریباً 187 روپے) ہو گیا ہے۔
متحدہ عرب امارات میں پیٹرولیم مصنوعات کی یہ نئی قیمتیں آج سے نافذالعمل ہیں۔ اماراتی وزارتِ توانائی کے تحت فیول پرائس مانیٹرنگ کمیٹی ہر ماہ عالمی منڈی میں تیل کی اوسط قیمتوں کی بنیاد پر نرخوں کا تعین کرتی ہے، جس میں تقسیم کار کمپنیوں کے آپریشنل اخراجات بھی شامل کیے جاتے ہیں۔
دوسری جانب پاکستان میں حکومت نے آئندہ پندرہ روز کے لیے پیٹرول کی فی لیٹر قیمت میں 2 روپے 43 پیسے اور ڈیزل کی قیمت میں 3 روپے 2 پیسے اضافہ کیا ہے۔ اس اضافے کے بعد پاکستان میں پیٹرول کی نئی قیمت 265 روپے 45 پیسے اور ڈیزل کی قیمت 278 روپے 44 پیسے فی لیٹر مقرر کی گئی ہے۔
