طبعیات کا نوبیل انعام حاصل کرنیوالے سائنس دانوں کے ناموں کا اعلان

رائل سویڈش اکیڈمی آف سائنسز نے سال 2025 میں طبعیات کے شعبے میں نوبیل انعام حاصل کرنے والے سائنس دانوں کے ناموں کا اعلان کر دیا۔

ادارے کے مطابق *جان کلارک، مائیکل ڈیووریٹ* اور *جان مرٹینیز* کو *میکرواسکوپک کوانٹم مکینیکل ٹنلنگ* اور *الیکٹرک سرکٹ میں انرجی کوانٹائزیشن* کی دریافت پر نوبیل انعام سے نوازا گیا ہے۔

ایوارڈ کے ساتھ 12 لاکھ ڈالر کی انعامی رقم بھی دی جائے گی جو تینوں سائنس دانوں میں برابر تقسیم ہوگی۔ انعام کی تقریب 10 دسمبر کو اسٹاک ہوم میں منعقد ہوگی۔

نوبیل کمیٹی برائے فزکس کے چیئرمین *اولی ایرکسن* کا کہنا تھا کہ آج کوئی بھی جدید ٹیکنالوجی ایسی نہیں جو کوانٹم مکینکس پر انحصار نہ کرتی ہو۔

چارمرز یونیورسٹی آف ٹیکنالوجی کے *گورن جوہانسن* کے مطابق، ایوارڈ پانے والے تینوں سائنس دانوں نے کوانٹم ٹنلنگ کو مائیکروسکوپک دنیا سے سپر کنڈکٹنگ چپس تک پہنچایا، جس سے طبعیات دانوں کو کوانٹم فزکس کو بہتر طور پر سمجھنے اور بالآخر کوانٹم کمپیوٹر تیار کرنے میں مدد ملی۔

پروفیسر *جان کلارک* یونیورسٹی آف کیلیفورنیا، برکیلے سے وابستہ ہیں، جبکہ *مائیکل ڈیووریٹ* ییل یونیورسٹی اور *جان مرٹینیز* یونیورسٹی آف کیلیفورنیا، سانٹا باربرا میں بطور پروفیسر خدمات انجام دے رہے ہیں۔