ماہرین صحت کے مطابق توانائی حاصل کرنے کے لیے انرجی ڈرنکس کا زیادہ استعمال صحت کے لیے نقصان دہ ثابت ہو سکتا ہے۔ ان مشروبات میں عموماً کیفین اور شوگر کی مقدار زیادہ ہوتی ہے جس کے باعث بلڈ پریشر میں اضافہ، دل کی دھڑکن کا بے ترتیب ہونا اور کچھ وقت بعد اچانک تھکن محسوس ہونے جیسے مسائل پیدا ہو سکتے ہیں۔
کیا رات کو دہی کھانا صحت کیلئے نقصاندہ ہے؟
رپورٹس کے مطابق اگر انرجی ڈرنکس کا مسلسل استعمال کیا جائے تو وقت گزرنے کے ساتھ بے چینی، نیند کی کمی اور دل سے متعلق بیماریوں کے خطرات بھی بڑھ سکتے ہیں۔ اس کے مقابلے میں ماہرین کا کہنا ہے کہ توانائی کے حصول کے لیے قدرتی غذاؤں کو ترجیح دینا بہتر ہے کیونکہ یہ جسم کو متوازن اور دیرپا توانائی فراہم کرتی ہیں۔ اس طرح کی غذائیں بلڈ شوگر کو متوازن رکھنے میں مدد دیتی ہیں اور میٹابولزم سمیت مجموعی صحت کے لیے ضروری غذائی اجزا بھی فراہم کرتی ہیں۔
قدرتی طور پر توانائی بڑھانے والی غذاؤں میں کیلا کو نمایاں مقام حاصل ہے۔ کیلے میں قدرتی شکر، فائبر اور پوٹاشیم موجود ہوتے ہیں جو جسم کو فوری توانائی فراہم کرتے ہیں۔ اس میں موجود کاربوہائیڈریٹس اور الیکٹرولائٹس کا امتزاج جسمانی توانائی کو تیزی سے بحال کرنے میں مدد دیتا ہے۔
اسی طرح جو بھی توانائی فراہم کرنے والی ایک بہترین غذا سمجھی جاتی ہے۔ جو میں موجود کمپلیکس کاربوہائیڈریٹس آہستہ آہستہ ہضم ہوتے ہیں جس کے نتیجے میں جسم کو دیر تک توانائی ملتی رہتی ہے۔ اس میں پایا جانے والا فائبر خون میں شوگر کی سطح کو متوازن رکھنے میں مدد دیتا ہے اور اگر اسے میٹھے اسنیکس کے ساتھ استعمال کیا جائے تو بلڈ شوگر کے اتار چڑھاؤ کو کم کرنے میں بھی مدد مل سکتی ہے۔
خشک میوہ جات بھی توانائی کا ایک قدرتی ذریعہ ہیں۔ ان میں صحت مند چکنائیاں، پروٹین اور میگنیشیم وافر مقدار میں پائے جاتے ہیں۔ ماہرین کے مطابق خشک میوہ جات کی ایک مٹھی فوری طور پر جسم کی توانائی بحال کرنے میں مدد دے سکتی ہے اور انسان کو زیادہ دیر تک توانا محسوس کراتی ہے۔
اسی طرح سیاہ چاکلیٹ بھی فوری توانائی فراہم کرنے والی غذاؤں میں شامل ہے۔ اس میں قدرتی طور پر کیفین اور تھیوبرومائن موجود ہوتے ہیں جو جسم کو توانائی فراہم کرتے ہیں۔ اس کے علاوہ اس میں پائے جانے والے اینٹی آکسیڈنٹس خون کے بہاؤ کو بہتر بناتے ہیں جس سے دماغ اور پٹھوں تک آکسیجن کی فراہمی میں اضافہ ہوتا ہے۔
یونانی دہی بھی توانائی برقرار رکھنے کے لیے مفید سمجھا جاتا ہے کیونکہ اس میں پروٹین کی مقدار زیادہ ہوتی ہے۔ اس کے ساتھ موجود کاربوہائیڈریٹس جسم کو فوری توانائی فراہم کرتے ہیں جبکہ اس میں شامل پروبائیوٹکس نظامِ ہاضمہ کو بہتر بنانے میں مدد دیتے ہیں، اسی لیے اسے ایک صحت مند اور توانائی بخش سنیک قرار دیا جاتا ہے۔
انڈے بھی غذائیت سے بھرپور خوراک ہیں جو اعلیٰ معیار کی پروٹین اور وٹامن بی فراہم کرتے ہیں۔ یہ غذائی اجزا خوراک کو توانائی میں تبدیل کرنے میں مدد دیتے ہیں جبکہ ان میں موجود امینو ایسڈز پٹھوں کی مضبوطی اور طاقت میں اضافہ کرتے ہیں۔ اسی وجہ سے انڈوں کو فوری اور دیرپا توانائی فراہم کرنے والی مؤثر غذا سمجھا جاتا ہے۔
