پاکستانی شہریوں کی اوسط آمدن میں اضافہ ہوگیا ہے جبکہ کرائے داروں کی تعداد میں اضافہ اور ذاتی ملکیت کے گھروں میں کمی ریکارڈ کی گئی ہے۔ ادارہ شماریات کی جانب سے جاری کردہ ہاؤس ہولڈ انٹیگریٹڈ اکنامک سروے کے مطابق گزشتہ 5 سال میں شہریوں کی اوسط آمدنی میں 97 فیصد اضافہ ہوگیا ہے جبکہ 2019 سے 2025 تک گھریلو اخراجات میں 113 فیصد اضافہ ہوا۔ ملک میں اوسطاً ماہانہ آمدن 82 ہزار اور اخراجات 79 ہزار روپے ہیں۔
مقامی ریفائنریز میں تیار کیے جانے والے پیٹرول میں ایتھنول کی آمیزش سے متعلق تجویز
سروے کے مطابق اخراجات میں سب سے زیادہ اضافہ فرنشنگ، گھریلو آلات، ہیلتھ، فوڈز، گڈز اینڈ سروسز پر ریکارڈ کیا گیا۔ بڑھتی ہوئی آبادی کے باعث ذاتی ملکیتی گھروں کی شرح میں کمی ریکارڈ کی گئی ہے۔ سروے کے مطابق 2018-19 میں 84 فیصد لوگوں کے پاس اپنے گھر تھے جبکہ موجودہ سروے میں یہ شرح 82 فیصد رہ گئی ہے۔ اس کے برعکس کرائے کے گھروں میں رہنے والوں کی تعداد 10 فیصد سے بڑھ کر 10.5 فیصد ہوگئی ہے۔
ہاؤس ہولڈ اکنامک سروے رپورٹ کے مطابق ملک بھر میں کلین فیول کے استعمال میں اضافہ ریکارڈ ہوا ہے اور پانچ سال میں اس کا استعمال 35 فیصد سے بڑھ کر 38 فیصد ہو گیا ہے۔ لائٹنگ اور کوکنگ کے لیے نیچرل گیس، ایل پی جی، بائیو گیس اور سولر انرجی کا استعمال بڑھ گیا۔ ہینڈ پمپ سے پانی استعمال کرنے والوں کی شرح 24 فیصد سے کم ہو کر 22 فیصد رہ گئی ہے جبکہ نل سے پانی استعمال کرنے والوں کی شرح 18 فیصد سے بڑھ کر 22 فیصد ہو چکی ہے۔ اسی طرح فلٹر کا پانی استعمال کرنے والوں کی شرح 9 فیصد سے بڑھ کر 10 فیصد ریکارڈ کی گئی ہے۔
سروے کے مطابق ملک میں 7 فیصد آبادی ابھی تک لیٹرین جیسی بنیادی سہولت سے محروم ہے۔ ڈیجیٹل پلیٹ فارم کے ذریعے آمدن میں ٹک ٹاک سب سے آگے ہے، جہاں ڈیجیٹل پلیٹ فارم استعمال کرنے والے 88 فیصد لوگ ٹک ٹاک استعمال کرتے ہیں، جبکہ یوٹیوب چینل پر وی لاگ کرنے والے لوگ 86 فیصد ہیں۔
